തിരുവനന്തപുരം: നഗരത്തിലെ സ്കൂള് കുട്ടികള്ക്ക് കൈത്താങ്ങുമായി തിരുവനന്തപുരം കോര്പറേഷന്. മേയര് കെയര് എന്ന പദ്ധതിയിലുള്പ്പെടുത്തിയാണ് കോര്പറേഷന് പരിധിയിലെ അര്ഹരായ കുട്ടികള്ക്ക് സ്കൂള് കിറ്റുകള് നല്കുന്നത്. സ്കൂള് തുറക്കുമ്പോള് കുട്ടികള്ക്ക് പുസ്തകങ്ങളും ബാഗും മറ്റും വാങ്ങുവാന് നഗരത്തിലെ നിരവധി കുടുംബങ്ങള് ബുദ്ധിമുട്ടാറുണ്ട്. ജനങ്ങളുടെ ഈ ബുദ്ധിമുട്ട് മനസിലാക്കിയാണ് നഗരസഭ അദ്ധ്യയന വര്ഷത്തേക്ക് ആവശ്യമായ പഠനോപകരണങ്ങള് വിതരണം ചെയ്യാന് തീരുമാനിച്ചതെന്ന് മേയര് വി.വി. രാജേഷ് പറഞ്ഞു.
കോര്പറേഷന്റെ പ്ലാന് ഫണ്ടോ തനത് ഫണ്ടോ ഉപയോഗിക്കാതെയാണ് കിറ്റ് വിതരണം ചെയ്യുന്നത്. കോര്പറേഷനെ സഹായിക്കാന് സന്മനസ്സുകാണിക്കുന്ന വ്യക്തികളില് നിന്ന് ഉത്പന്നമായി സ്വീകരിച്ചാണ് കിറ്റുകള് വിതരണം ചെയ്യുന്നത്. കൂടാതെ ചില ബാങ്കുകളുടെ സിഎസ്ആര് ഫണ്ട് ഉപയോഗിച്ച് അവര് കിറ്റുകള് വാങ്ങി നല്കാമെന്നും അറിയിച്ചിട്ടുണ്ട്. ഇതിനായി യാതൊരു വിധ പണപ്പിരിവും നടത്തുന്നതല്ല. ഒരോ വാര്ഡിലെയും 50 കുട്ടികള്ക്ക് വീതമാണ് കിറ്റ് വിതരണം ചെയ്യുക. കോര്പറേഷന് പരിധിയിലെ സര്ക്കാര് സ്കൂളുകളില് നിന്നും ചില എയ്ഡഡ് സ്കൂളുകളില് നിന്നുമുള്ള കുട്ടികള്ക്കാണ് കിറ്റ് വിതരണം ചെയ്യുന്നത്. വിദ്യാഭ്യാസ വകുപ്പ് തയാറാക്കുന്ന ലിസ്റ്റ് അനുസരിച്ചാണ് കിറ്റുകള് നല്കുന്നത്. സ്കൂള് ബാഗ്, നോട്ട്ബുക്കുകള്, ഇന്സ്ട്രുമെന്റ് ബോക്സ്, ടിഫിന് ബോക്സ്, വാട്ടര് ബോട്ടില്, കുട എന്നിവയടങ്ങിയതാണ് കിറ്റ്. ഇന്ന് രാവിലെ 10ന് കോര്പറേഷന് ഓഫീസില് നടക്കുന്ന ചടങ്ങ് മേയര് വി.വി. രാജേഷ് ഉദ്ഘാടനം ചെയ്യും. ഡെപ്യൂട്ടി മേയര് ജി.എസ്. ആശാനാഥ് അധ്യക്ഷത വഹിക്കുന്ന ചടങ്ങില് സ്ഥിരം സമിതി അധ്യക്ഷന്മാര്, കൗണ്സിലര്മാര്, നഗരസഭാ സെക്രട്ടറി തുടങ്ങിയവര് പങ്കെടുക്കും. ചടങ്ങില് കിറ്റുകള് കൗണ്സിലര്മാര്ക്ക് കൈമാറും. കൗണ്സിലര്മാര് അവരവരുടെ വാര്ഡുകളിലെ സ്കൂളുകളില് കിറ്റുകള് വിതരണം ചെയ്യുമെന്നും വരും വര്ഷങ്ങളിലും മേയര് കെയര് പദ്ധതി തുടരുമെന്നും വി.വി. രാജേഷ് പറഞ്ഞു.
സ്കൂള് കിറ്റുകളുടെ പാക്കിങ് കഴിഞ്ഞ ദിവസങ്ങളില് കോര്പറേഷന് ഓഫീസില് നടന്നു. മേയര് വി.വി. രാജേഷിന്റെയും ഡെപ്യൂട്ടി മേയര് ആശാനാഥിന്റെയും നേതൃത്വത്തിലാണ് കൗണ്സിലര്മാര് കിറ്റുകള് തയാറാക്കിയത്.
