ചങ്ങനാശ്ശേരി: മാടപ്പള്ളി പുതുപ്പറമ്പില് രാജേഷ്-അഞ്ജു ദമ്പതികളുടെ മകന് അഖിലേഷ് കാഴ്ച പരിമിതി നേരിട്ട് പഠനത്തില് എല്ലാവിഷയങ്ങള്ക്കും എ പ്ലസ് കരസ്ഥമാക്കി.
കാഴ്ച അഖിലേഷിന് ഒരിക്കലും വെല്ലുവിളിയായിട്ടില്ല. പരീക്ഷയ്ക്ക് തയാറെടുക്കും മുമ്പേ എല്ലാ വിഷയങ്ങള്ക്കും എ പ്ലസ് നേടുമെന്ന് രക്ഷാകര്ത്താക്കള്ക്കും അദ്ധ്യാപകര്ക്കും ഉറപ്പായിരുന്നു.
കറുകച്ചാല് എന്എസ്എസ് ഹയര്സെക്കന്ഡറി സ്കൂളിലെ ഹ്യുമാനിറ്റീസ് വിദ്യാര്ത്ഥി അഖിലേഷ് രാജാണ് കാഴ്ചപരിമിതി മറികടന്ന് ഉജ്ജ്വലവിജയം നേടിയത്. പഠനത്തിലും പാഠ്യേതര പ്രവര്ത്തനങ്ങളിലും മിടുക്കനായ അഖിലേഷ് എസ്എസ്എസ്എല്സി പരീക്ഷയിലും പ്ലസ് വണ് പരീക്ഷയിലും എല്ലാ വിഷയങ്ങള്ക്കും എ പ്ലസ് നേടിയിരുന്നു.
നെടുംകുന്നം സെന്റ് തെരേസാസ് ഹൈസ്കൂളിലെ ഫാത്തിമ സുല്ത്താനയാണ് അഖിലേഷിനുവേണ്ടി പരീക്ഷ എഴുതിയത്.
സ്കൂളില്നിന്ന് തയാറാക്കി നല്കുന്ന നോട്ടുകള് അച്ഛനും അമ്മയും ചേര്ന്നാണ് പഠിപ്പിച്ചിരുന്നത്. ആഴ്ചതോറും ട്യൂഷനും നല്കിയിരുന്നു. ഉജ്ജ്വലബാല്യ പുരസ്കാരമടക്കം നേടിയിട്ടുള്ള അഖിലേഷ് സ്കൂള് കലോത്സവങ്ങളിലും സമ്മാനങ്ങള് നേടിയിട്ടുണ്ട്.
ഏഴാംക്ലാസ് വരെ ഒളശ്ശ അന്ധവിദ്യാലയത്തിലാണ് പഠിച്ചത്. തുടര്ന്ന് ഹൈസ്കൂള് പഠനം നെടുംകുന്നം ഗവ. ഹൈസ്കൂളിലും. ബ്രെയ്ലി ലിപിയും പരിശീലിച്ചിട്ടുണ്ട്.
പഠനത്തോടൊപ്പം മൃദംഗം, കീബോര്ഡ്, ഓടക്കുഴല് എന്നിവയിലും പ്രാവീണ്യം നേടിയിട്ടുണ്ട്. സിവില് സര്വീസിന് പഠിക്കണമെന്നാണ് അഖിലേഷിന്റെ ആഗ്രഹം. ബിരുദം നേടിയശേഷം ആഗ്രഹവുമായി മുന്നോട്ട് പോകാനാണ് വീട്ടുകാരുടെ തീരുമാനം. സഹോദരി ഗൗരിനന്ദന മാടപ്പള്ളി സി.എസ്.യു.പി. സ്കൂള് ഏഴാം ക്ലാസ് വിദ്യാര്ത്ഥിനിയാണ്.
