ന്യൂദല്ഹി: ഭാരതത്തില് ഔദ്യോഗിക സന്ദര്ശനത്തിനെത്തിയ യുഎസ് സ്റ്റേറ്റ് സെക്രട്ടറി മാര്ക്കോ റൂബിയോയുടെ താജ്മഹല് സന്ദര്ശനത്തിനെതിരെ രൂക്ഷവിമര്ശനവുമായി ഇറാന്. താജ്മഹലിന്റെ ചരിത്രവും വാസ്തുവിദ്യയും അറിയാമായിരുന്നെങ്കില് റൂബിയോ അവിടെ നിന്ന് ചിത്രമെടുക്കാന് നില്ക്കില്ലായിരുന്നുവെന്ന് ഹൈദരാബാദിലെ ഇറാനിയന് കോണ്സുലേറ്റ് പ്രതികരിച്ചു.
ചക്രവര്ത്തിയുടെ ഇറാനിയന് ഭാര്യയോടുള്ള സ്നേഹത്തിന്റെ പേരില് ഇറാനിയന് വാസ്തുശില്പികളുടെ മികവിലാണ് ഈ സ്മാരകം നിര്മിക്കപ്പെട്ടത്. എന്നാല് ഇന്ന് യുഎസ് ഭരണകൂടം ഇറാനിയന് സംസ്കാരത്തെ തന്നെ തുടച്ചുനീക്കുമെന്ന് ഭീഷണിപ്പെടുത്തുകയാണെന്നും ഇറാന് കുറ്റപ്പെടുത്തി.
കഴിഞ്ഞ ദിവസമാണ് ഭാര്യ ജീനറ്റിനൊപ്പം റൂബിയോ താജ്മഹല് സന്ദര്ശിച്ചത്. സന്ദര്ശിക്കുന്ന രാജ്യങ്ങളുടെ സംസ്കാരത്തോട് ആദരവ് കാണിക്കേണ്ടത് പ്രധാനമാണെന്ന് പറഞ്ഞ റൂബിയോ, യുഎസ് പ്രസിഡന്റ് ഡൊണാള്ഡ് ട്രംപിന് ന്യൂജേഴ്സിയിലുണ്ടായിരുന്ന ‘താജ്മഹല്’ എന്ന കാസിനോയെക്കുറിച്ച് മാത്രമാണ് തനിക്ക് അറിയാമായിരുന്നതെന്ന് തമാശയായി പറഞ്ഞിരുന്നു. ഇതിന് പിന്നാലെയാണ് ഇറാന്റെ വിമര്ശനം.
