കൊച്ചി: വേഗതയേറിയതും വിശ്വസനീയവുമായ തപാല് സേവനങ്ങള് പ്രഖ്യാപിച്ച് തപാല് വകുപ്പ്.
ഡിജിറ്റല് സൗകര്യങ്ങളോടു കൂടി പരിഷ്കരിച്ച മെയില് സര്വീസ് നെറ്റ്വര്ക്കിനൊപ്പം പാഴ്സല് പിക്ക്- അപ്പ് പോയിന്റുകള്, ചെടികളും തൈകളും സുരക്ഷിതമായി എത്തിക്കല്, അതേ ദിവസം തന്നെയുള്ള ഡെലിവറി എന്നിവയുമായി ബന്ധപ്പെട്ടാണ് പുതിയ പ്രഖ്യാപനം. പിക്ക് പോസ്റ്റ് എക്സ്പ്രസ്, കാപ്പിറ്റല് എക്സ്പ്രസ്, ഗ്രീന് എക്സ്പ്രസ് എന്നീ പദ്ധതികള്ക്ക് തുടക്കം കുറിച്ചതായി ചീഫ് പോസ്റ്റ്മാസ്റ്റര് ജനറല് പി.എന്. രഞ്ജിത് കുമാര് അറിയിച്ചു.
2025-26 സാമ്പത്തിക വര്ഷത്തില് തപാല് വകുപ്പ് ദേശീയതലത്തില് 16 ശതമാനം വരുമാന വളര്ച്ചയാണ് രേഖെപ്പടുത്തിയത്. കേരള പോസ്റ്റല് സര്ക്കിളിന് വരുമാനത്തില് 10 ശതമാനം വളര്ച്ചയാണ് കൈവരിക്കാനായത്. ലോക്ക്ഡൗണിന് ശേഷമുള്ള കാലയളവില് ഇതാദ്യമായാണ് കേരള സര്ക്കിള് രണ്ടക്ക വളര്ച്ച നേടുന്നത്. ട്രെയിന് അധിഷ്ഠിത ഗതാഗത സംവിധാനങ്ങളില് നിന്ന് പ്രത്യേക റോഡ് ശൃംഖലകളിലേക്ക് മാറും. ഇതിലൂടെ ചിലവ് 43 ശതമാനം കുറയുമെന്നാണ് പ്രതീക്ഷിക്കുന്നത്. ഇത് ഡെലിവറി സമയക്രമം മെച്ചപ്പെടുത്തുന്നതിനൊപ്പം പ്രതിവര്ഷം ഏകദേശം ആറ് കോടിയുടെ ലാഭമുണ്ടാക്കുമെന്നും അദ്ദേഹം അറിയിച്ചു. വാര്ത്താസമ്മേളനത്തില് പിഐബി അസിസ്റ്റന്റ് ഡയറക്ടര് ലക്ഷ്മിപ്രിയ എസ്.എസ്., പോസ്റ്റ് മാസ്റ്റര് ജനറല് ടി. നിര്മ്മല ദേവി, പോസ്റ്റല് സര്വീസ് ഡയറക്ടര്മാരായ എന്.ആര്. ഗിരി, ഗണേശ് കുമാര് വി.ബി. എന്നിവര് പങ്കെടുത്തു.
