തിരുവനന്തപുരം: നവകേരളാ യാത്രയ്ക്കിടെ യൂത്ത് കോണ്‍ഗ്രസ് നേതാക്കളെ മര്‍ദ്ദിച്ച സംഭവത്തില്‍ മുന്‍കൂര്‍ ജാമ്യാപേക്ഷയുമായി മുന്‍മുഖ്യമന്ത്രി പിണറായി വിജയന്റെ മൂന്ന് സുരക്ഷാസേനാംഗങ്ങള്‍ കൂടി. എസ്‌ഐടി പ്രതി ചേര്‍ത്ത ഷൈജു, വിപിന്‍, അരുണ്‍ എന്നിവരാണ് മുന്‍കൂര്‍ ജാമ്യാപേക്ഷ നല്‍കിയത്.ഇവരുടെ ജാമ്യാപേക്ഷ ജൂണ്‍ രണ്ടിന് പരിഗണിക്കും.മൂവര്‍ക്കുമെതിരെ ജാമ്യം ലഭിക്കാവുന്ന വകുപ്പുകളാണ് ചുമത്തിയിട്ടുളളത്.
ഗണ്‍മാന്‍ ഉള്‍പ്പെടെയുള്ള സുരക്ഷാ ഉദ്യോഗസ്ഥര്‍ നല്‍കിയ മുന്‍കൂര്‍ ജാമ്യാപേക്ഷയില്‍ പ്രോസിക്യൂഷനെ ആലപ്പുഴ ജില്ലാ സെഷന്‍സ് കോടതി രൂക്ഷമായി വിമര്‍ശിച്ചിരുന്നു. എസ്‌ഐടി സമര്‍പ്പിച്ച അന്വേഷണ റിപ്പോര്‍ട്ട് പൂര്‍ണമല്ലെന്ന് കോടതി ചൂണ്ടിക്കാട്ടി.ജാമ്യം ലഭിക്കുന്ന വകുപ്പുകളില്‍ എന്തിന് മുന്‍കൂര്‍ ജാമ്യമെന്നും ചോദിച്ച് ഹര്‍ജി കോടതി തീര്‍പ്പാക്കി.
ജാമ്യഹര്‍ജിയെ എതിര്‍ത്ത് പ്രോസിക്യൂഷന്‍ സത്യവാംഗ്മൂലം സമര്‍പ്പിക്കാത്തതും കോടതിയില്‍ നല്‍കിയ റിപ്പോര്‍ട്ടില്‍, ചുമത്തിയ വകുപ്പുകള്‍ ചേര്‍ക്കാത്തതിനുമാണ് പ്രോസിക്യൂഷനെയും അന്വേഷണ ഉദ്യോഗസ്ഥനെയും കോടതി ശകാരിച്ചത്. കേസില്‍ പ്രതികളായ അഞ്ച് സുരക്ഷാ ഉദ്യോഗസ്ഥരെ ചൊവ്വാഴ്ച സസ്‌പെന്‍ഡ് ചെയ്തിട്ടുണ്ട്.
