ദല്ഹി: രാജ്യത്തെ പല സംസ്ഥാനങ്ങളിലും ബി ജെ പി വലിയ ശക്തിയായി മാറിയെന്ന് സി പി എം ജനറല് സെക്രട്ടറി എം എ ബേബി. എന്നാല് കേരളത്തില് ബി ജെ പിയുടെ വലിയ മുന്നേറ്റത്തെ ഒരു പരിധിവരെ ചെറുക്കാന് സാധിച്ചു. തമിഴ്നാട്ടില് ബി ജെ പി പൂര്ണമായി തകര്ന്നതായാണ് വിലയിരുത്തല്.
സി പി എം കേന്ദ്രകമ്മിറ്റി യോഗത്തിന് ശേഷം കേരളത്തിലേതടക്കം തെരഞ്ഞെടുപ്പ് ഫലങ്ങള് വിശദീകരിക്കുകയായിരുന്നു എം എ ബേബി.കേരളത്തിലെ പരാജയം പാര്ട്ടിക്കേറ്റ കനത്ത തിരിച്ചടിയാണ്.1977 ന് ശേഷം രാജ്യത്ത് ഒരു സംസ്ഥാനത്തും ഇടത് സര്ക്കാരില്ലാത്ത സാഹചര്യം വന്ന ആദ്യ തെരഞ്ഞെടുപ്പാണിതെന്നും അദ്ദേഹം ചൂണ്ടിക്കാട്ടി.
കേരളത്തിലെ തോല്വി അതീവ ഗൗരവമേറിയതാണ്.പാര്ട്ടിയും മുന്നണിയും ഇതിന്റെ കാരണങ്ങള് കൃത്യമായി പരിശോധിച്ചുവരികയാണ്. ഭയരഹിതവും സ്വതന്ത്രവുമായ ചര്ച്ചകളാണ് പാര്ട്ടിയില് നടക്കുന്നത്.വിവിധ സംസ്ഥാനങ്ങളിലെ തെരഞ്ഞെടുപ്പ് അവലോകന റിപ്പോര്ട്ടുകള് വിശദമായി വിലയിരുത്തുന്നതിനായി ജൂലായ് മാസത്തില് പ്രത്യേക കേന്ദ്രകമ്മിറ്റി യോഗം ചേരുമെന്നും എം എ ബേബി അറിയിച്ചു.കേരളത്തിലും തീവ്ര വലതുപക്ഷ സാന്നിധ്യം ഉദിച്ചുയര്ന്നു കഴിഞ്ഞുവെന്നത് ഗുരുതര സ്ഥിതിവിശേഷമാണ് ഉണ്ടാക്കിയിരിക്കുന്നത്. തെരഞ്ഞെടുപ്പ് കമ്മീഷന് സ്വീകരിച്ച ചില നിലപാടുകളും ഇപ്പോഴത്തെ ഈ സാഹചര്യത്തിന് കാരണമാണെന്ന് അദ്ദേഹം ആരോപിച്ചു.
