ഇടുക്കി: സിപിഐ ഇടുക്കി മുന് ജില്ലാ സെക്രട്ടറി കെ കെ ശിവരാമന് എതിരെ നടപടിയുമായി പാര്ട്ടി. ജില്ലാ എക്സിക്യൂട്ടീവില് നിന്നും കൗണ്സിലില് നിന്നും കെ കെ ശിവരാമനെ ഒഴിവാക്കിയ ജില്ല എക്സിക്യൂട്ടീവ് തീരുമാനം ജില്ല കൗണ്സില് അംഗീകരിച്ചു. പീരുമേട്ടിലെ പരാജയത്തിലെ പരസ്യ വിമര്ശനത്തെ തുടര്ന്നാണ് നടപടി. പരസ്യ പ്രസ്താവനകള് പാര്ട്ടിയെ പ്രതിരോധത്തിലാക്കിയെന്ന് സിപിഐ ജില്ലാ സെക്രട്ടിറി കെ സലീംകുമാര് പറഞ്ഞു.
പീരുമേട്ടിലെ സ്ഥാനാര്ത്ഥിത്വം പാളിയെന്ന് കെ കെ ശിവരാമന് പരസ്യമായി പറഞ്ഞിരുന്നു.മണ്ഡലത്തിലെ ചരിത്രത്തില് തന്നെ ഏറ്റവും ഉയര്ന്ന ഭൂരിപക്ഷമായ 27634 വോട്ടിനാണ് കോണ്ഗ്രസ് സ്ഥാനാര്ഥി വിജയിച്ചത്.സംഘടനാ പ്രവര്ത്തന ചട്ടങ്ങള് പാലിക്കുന്നില്ലെന്നാണ് ശിവരാമനെതിരായ ആരോപണം. നിരന്തരമായി ശിവരാമന് നേതാക്കള്ക്കെതിരെ വിമര്ശനം ഉന്നയിക്കുന്നതിനാല് നടപടി അനിവാര്യമെന്നാണ് ജില്ലാ എക്സിക്യൂട്ടീവ് യോഗം തീരുമാനിച്ചത്.
ഏറെ നാളായി പാര്ട്ടി ജില്ലാ നേതൃത്വവുമായി അകല്ച്ചയിലായ ശിവരാമനെ നിയമസഭാ തിരഞ്ഞെടുപ്പിന് തൊട്ടുമുമ്പ് സംസ്ഥാന നേതൃത്വം ഇടപെട്ട് അനുനയിപ്പിക്കുകയായിരുന്നു. 16 വര്ഷം സി.പി.ഐ.യുടെ ജില്ല സെക്രട്ടറിയായിരുന്നു.
