ലക്നൗ : ഉത്തർപ്രദേശിൽ 2027 ൽ നിയമസഭാ തിരഞ്ഞെടുപ്പ് നടക്കാനിരിക്കുകയാണ് . യുപിയിൽ യോഗി ആദിത്യനാഥ് തന്നെയാകും വീണ്ടും അധികാരത്തിലേറുക എന്നാണ് പല സർവ്വേകളും വ്യക്തമാക്കുന്നത് . അതിന് അടിവരയിടുകയാണ് ഹിന്ദുസ്ഥാനി പസ്മാണ്ട മഞ്ചിന്റെ ദേശീയ വക്താവ് മുഹമ്മദ് റിസ്വാൻ അൻസാരി നടത്തിയ പ്രസ്താവന .
നൂറ്റാണ്ടുകളായി കഠിനാധ്വാനത്തിലൂടെയും കഴിവുകളിലൂടെയും രാഷ്ട്രനിർമ്മാണത്തിന് സംഭാവന നൽകിയെങ്കിലും സാമൂഹിക വിവേചനം, രാഷ്ട്രീയ അവഗണന, മതേതര പാർട്ടികൾ എന്ന് വിളിക്കപ്പെടുന്നവരുടെ വോട്ട് ബാങ്ക് രാഷ്ട്രീയം എന്നിവ കാരണം അവകാശങ്ങൾ നിഷേധിക്കപ്പെട്ട, കഠിനാധ്വാനികളായ മുസ്ലീം സമൂഹത്തെയാണ് ഹിന്ദുസ്ഥാനി പസ്മാന്ദ ഫോറം പ്രതിനിധീകരിക്കുന്നതെന്ന് റിസ്വാൻ അൻസാരി പറഞ്ഞിരുന്നു.
വർഷങ്ങളായി ആർഎസ്എസിനെക്കുറിച്ച് സൃഷ്ടിക്കപ്പെട്ടിട്ടുള്ള സ്റ്റീരിയോടൈപ്പുകൾ പൂർണ്ണമായും കൃത്യമല്ലെന്നാണ് റിസ്വാൻ അൻസാരി പറഞ്ഞത് . ആർഎസ്എസ് മുസ്ലീങ്ങളുടെ ശത്രുവോ മതഭ്രാന്തിന്റെ പ്രതീകമോ അല്ല, മറിച്ച് ദേശീയ ഐക്യത്തിനും സാമൂഹിക ഐക്യത്തിനും വേണ്ടി വാദിക്കുന്ന സംഘടനയാണെന്ന് അദ്ദേഹം പറഞ്ഞു. മുസ്ലീം മതനേതാക്കളെയും മുസ്ലീം വ്യക്തിനിയമ ബോർഡിനെയും ലക്ഷ്യമിട്ട്, ചില വ്യക്തികൾ മുസ്ലീം സമൂഹത്തെ തെറ്റിദ്ധരിപ്പിക്കുകയാണെന്നും അദ്ദേഹം ആരോപിച്ചു.
മുസ്ലീങ്ങൾ ആർഎസ്എസിനെ ഭയപ്പെടേണ്ടതില്ലെന്നും, സ്വന്തം സമുദായത്തിൽ നിന്ന് തങ്ങളെ തെറ്റിദ്ധരിപ്പിക്കുന്നവരെയും, ജിഹാദിനായി മുറവിളി കൂട്ടുന്നവരെയും സൂക്ഷിക്കണമെന്നുമാണ് റിസ്വാൻ അൻസാരി പറഞ്ഞത്. യുപിയിൽ യോഗി ആദിത്യനാഥിന്റെ ഭരണത്തിൽ തങ്ങൾ തൃപ്തരാണെന്നും അൻസാരി പറഞ്ഞിരുന്നു.
