മലപ്പുറം:സിപിഎം പോളിറ്റ് ബ്യൂറോ അംഗം എ വിജയരാഘവനെതിരെ ഫ്ളക്സ്. സേവ് സിപിഎം എന്ന പേരിലാണ് തിരൂരില്‍ ഫ്ളക്സ് ഉയര്‍ന്നത്.വര്‍ഗീയവാദികളെ കൂട്ടുപിടിച്ച് പാര്‍ട്ടിയെ വിറ്റ് കാശാക്കി എന്നതടക്കം പരാമര്‍ശങ്ങളാണ് ഫ്ളക്സില്. എസ്ഡിപിഐ നേതാവിനൊപ്പം എ വിജയരാഘവന്‍ വിരുന്നില്‍ പങ്കെടുക്കുന്ന ചിത്രം ചര്‍ച്ചയായ പശ്ചാത്തലത്തിലാണ് ഫ്ളക്സ്
വര്‍ഗീയ വാദികളുമായി കൂട്ടുചേര്‍ന്ന ഇവനോടല്ലെ കടക്ക് പുറത്തെന്ന് പറയേണ്ടതെന്നാണ് ഫ്ളക്സില് എഴുതിയിരിക്കുന്നത്.ഞായറാഴ്ച വൈകിട്ടാണ് തിരൂര്‍ ജംഗ്ഷനില്‍ ബോര്‍ഡ് പ്രത്യക്ഷപ്പെട്ടത്. ഡിവൈഎഫ്ഐ തൃക്കണ്ടിയൂര്‍ വില്ലേജ് മുന്‍ സെക്രട്ടറിയായിരുന്ന കുന്നത്ത് ഷൗക്കത്തലിയുടെ നേതൃത്വത്തിലാണ് ബോര്‍ഡ് സ്ഥാപിച്ചതെന്നാണ് അറിയുന്നത്.
അതേസമയം എസ്ഡിപിഐ നേതാവിനൊപ്പം വിരുന്നില്‍ പങ്കെടുത്തത് സമൂഹ മാധ്യമങ്ങളില്‍ ഉള്‍പ്പെടെ വന്‍ വിമര്‍ശനങ്ങള്‍ക്ക് വഴിവച്ചതിനോട് പരിഹാസത്തോടെയാണ് എ വിജയരാഘവന്‍ പ്രതികരിച്ചത്. സുഹൃത്തുക്കള്‍ ഭക്ഷണം കഴിക്കാന്‍ വിളിച്ചാല്‍ ആരായാലും പോകുമെന്ന് അദ്ദേഹം പറഞ്ഞു.ഭക്ഷണം എവിടുന്നായാലും കഴിക്കണം. കഴിക്കുമ്പോള്‍ നല്ല ഭക്ഷണം കഴിക്കണം. ഉച്ഛിഷ്ടം ഭക്ഷിക്കരുത്. ഭക്ഷണം കഴിച്ചതിനെ തെറ്റായി ഉപയോഗിക്കുന്നത് ഹീനമായ വര്‍ഗീയബോധമുള്ളവരാണെന്നും വിജയരാഘവന്‍ പറഞ്ഞു.
