കൊച്ചി : മഴ കനക്കുന്നതിനാല് ഭൂതത്താന്ക്കെട്ട് ബാരേജിന്റെ ഷട്ടറുകള് തുറക്കും. ജലനിരപ്പ് ഉയരുന്നതിനാല് പെരിയാറിന്റെ തീരത്ത് താമസിക്കുന്നവര് ജാഗ്രത പാലിക്കണമെന്ന് നിര്ദേശം. എറണാകുളം ജില്ലയില് ഓറഞ്ച് ജാഗ്രത പ്രഖ്യാപിച്ചു.
തിരുവനന്തപുരം, കൊല്ലം, പാലക്കാട്, വയനാട് ഒഴികെ ബാക്കി പത്ത് ജില്ലകളില് മഞ്ഞ ജാഗ്രതയാണ്.തിങ്കളാഴ്ച ഒമ്പത് ജില്ലകളില് മഴ മുന്നറിയിപ്പുണ്ട്. ഈ മാസം ഇരുപത്തിയെട്ടാം തീയതിവരെ മഴ തുടരുമെന്നാണ് കാലാവസ്ഥാ പ്രവചനം.ബംഗാള് ഉള്ക്കടലിലും തെക്കന് അറബിക്കടലിലും ചക്രവാതചുഴി രൂപപ്പെട്ടതാണ് മഴ ശക്തമാകാനുള്ള കാരണം.കേരള, കര്ണാടക, ലക്ഷ്വദ്വീപ് തീരങ്ങളില് മീന്പിടുത്തത്തിന് വിലക്കുണ്ട്.
അതേസമയം,സംസ്ഥാനത്ത് മഴക്കെടുതി രൂക്ഷമാണ്.ആലപ്പുഴ അരൂരില് വീട്ടില് നിന്ന് കുളിക്കാനായി പുറത്തെ ശുചിമുറിയിലേക്ക് പോകുമ്പോള് ഇടിമിന്നലേറ്റ് അറുപതുകാരന് മരിച്ചു .ശക്തമായ മഴയില് ചെങ്ങന്നൂര് പുലിയൂരില് ശിവന്റെ വീട്ടുവളപ്പിലെ കിണര് ഇടിഞ്ഞ് താഴ്ന്നു. കൊല്ലം കുണ്ടറ കേരളപുരത്ത് കെ എസ് ആര് ടി സി ബസിന് മുകളിലേക്ക് മരം കടപുഴകി വീണു.തൃശൂര് ചൂണ്ടലില് ഓടിക്കൊണ്ടിരിരുന്ന കാറിന് മുകളിലേക്ക് മരക്കൊമ്പ് തുളച്ചു കയറിയും അപകടമുണ്ടായി. അപകടത്തില് ആര്ക്കും പരിക്കില്ല . കൊല്ലം മണ്റോ തുരുത്തില് സിംഗിള് ബെഡ് ഹൗസ് ബോട്ട് ഭാഗികമായി മുങ്ങി.അപകടം നടക്കുമ്പോള് ബോട്ടില് ഇരുപതോളം ആളുകള് ഉണ്ടായിരുന്നു. യാത്രക്കാര് എല്ലാവരും സുരക്ഷിതരാണ്.
