പുനലൂര്‍: വന ഹൃദയത്തിലെ ജലധാര ദര്‍ശിക്കാനും മുങ്ങി നിവരുവാനും, കാഴ്ചയുടെ വര്‍ണ്ണ കാഴ്ച തീര്‍ക്കാനും പാലരുവി ജലപാതത്തിലേയ്‌ക്ക് നാളെ മുതല്‍ സഞ്ചാരികള്‍ക്ക് പ്രവേശനം. വേനല്‍ ചൂടിനെത്തുടര്‍ന്ന് വറ്റിവരണ്ടതോടെ ജലപാതം ഫെബ്രുവരി 15ന് അടയ്‌ക്കുകയായിരുന്നു. വേനല്‍ മാറി മഴയെത്തിയതോടെ ജലപാതത്തില്‍ വീണ്ടും നീരൊഴുക്ക് തുടങ്ങി. ഇതോടെ പാലരുവിയിലേയ്‌ക്ക് സഞ്ചാരികള്‍ക്ക് നാളെ മുതല്‍ പ്രവേശനം അനുവദിച്ചിരിക്കുകയാണ്.
ഇവിടെയുള്ള കാടുപിടിച്ച പാതകള്‍ വൃത്തിയാക്കി സഞ്ചാരികള്‍ക്ക് വിശ്രമിക്കാനുള്ള മുറികളും, ശുചിമുറികളും കുളിക്കടവുകളും നവീകരിച്ചു. സഞ്ചാരികള്‍ക്ക് യഥേഷ്ടം കാഴ്ചകള്‍ കാണുവാനും കുളിക്കുവാനുള്ള സൗകര്യങ്ങളും ഒരുക്കിയിട്ടുണ്ട്. കഴിഞ്ഞ ദിവസങ്ങളില്‍ പ്രദേശവാസികളും മുന്‍ വനസംരക്ഷണ സമിതി അംഗങ്ങളുമായ അന്‍പതോളം ജോലിക്കാരാണ് നവീകരണ ജോലികള്‍ക്ക് നേതൃത്വം നല്‍കിയത്. വാഹനപാര്‍ക്കിംഗ് ഗ്രൗണ്ടും വൃത്തിയാക്കിയിട്ടുണ്ട്. ഇതോടെ ഏറെ നാളായി അടഞ്ഞുകിടന്ന പാലരുവിയ്‌ക്ക് ശാപമോക്ഷമായി.
പശ്ചിമഘട്ടത്തിലൂടെ ഒഴുകിയെത്തുന്ന ഔഷധഗുണം നിറഞ്ഞ ജലം 250 അടി താഴ്ചയിലേയ്‌ക്ക് പാറക്കൂട്ടങ്ങളില്‍ തട്ടി ചിന്നിച്ചിതറി ഒഴുകിയെത്തുന്ന കാഴ്ച ഏറെ മനോഹരമാണ്. കൊല്ലം-ചെങ്കോട്ട ദേശീയ പാതയില്‍ പാലരുവി ജംഗ്ഷനില്‍ നിന്ന് വനാന്തരത്തിലൂടെ വാഹനത്തില്‍ നാലു കിലോമീറ്റര്‍ യാത്ര ചെയ്താണ് ഇവിടെ എത്തേണ്ടത്. ഇക്കോ ടൂറിസത്തിന്റെ മൂന്ന് വാഹനങ്ങള്‍ ആണ് സര്‍വ്വീസ് നടത്തുന്നത്. 38 പേര്‍ക്ക് ഇരിക്കാവുന്ന രണ്ട് വാനുകളും, 25 പേരെ ഉള്‍ക്കൊള്ളുന്ന ഒരു വാഹനവുമാണ് ഉള്ളത്.
ടിക്കറ്റ് കൗണ്ടറില്‍ നിന്നും ജലപാതത്തിലേയ്‌ക്കും തിരികെയുമായി ടിക്കറ്റ് നിരക്ക് മുതിര്‍ന്നവര്‍- 70, സ്‌കൂള്‍ കുട്ടികള്‍-35, കുട്ടികള്‍-30 എന്നിങ്ങനെയാണ് ഈടാക്കുന്നത്. പാര്‍ക്കിംഗ് ബസ്- 200, മിനി ബസ്- 150, കാര്‍/ജീപ്പ്-60, ഓട്ടോ-25, ടൂ വീലര്‍-25 എന്നതാണ് പുതുക്കിയ നിരക്ക്. എല്ലാ ടിക്കറ്റ് നിരക്കലും 18 ശതമാനം ജിഎസ്ടിയും ഉണ്ടായിരിക്കും.
