പെരുമ്പാവൂര്: മലയിടംതുരുത്ത് പാരിയത്ത് കാവില് സുപ്രീംകോടതി ഉത്തരവ് അനുസരിച്ച് കുടിയൊഴിപ്പിക്കല് നടപടികളുമായി അഭിഭാഷക കമ്മീഷന് ഇന്നലെയും എത്തിയെങ്കിലും പോലീസ് സഹായം ഇല്ലാത്തതിനാല് മടങ്ങിപ്പോയി. ഇത് സംബന്ധിച്ച റിപ്പോര്ട്ട് തിങ്കളാഴ്ച കോടതിയില് സമര്പ്പിക്കും.
സുപ്രീംകോടതി ഉത്തരവിന്റെ അടിസ്ഥാനത്തില് കുടിയൊഴിപ്പിക്കല് നടപടികള് പൂര്ണമായും നടപ്പിലാക്കി 26 നുള്ളില് റിപ്പോര്ട്ട് ഹൈക്കോടതിയില് സമര്പ്പിക്കണമെന്നാണ് നിര്ദ്ദേശം. ഇതിന്റെ അടിസ്ഥാനത്തിലാണ് കഴിഞ്ഞ 20ന് അഭിഭാഷക കമ്മീഷന് ഇവിടെ എത്തിയത്. എന്നാല് ഇവിടത്തെ ദളിത് കുടുംബങ്ങളുടെ പ്രതിരോധം മൂലം അഭിഭാഷക കമ്മീഷന് മടങ്ങി പോകേണ്ടിവന്നു.
അതിനിടെ പ്രതിരോധം തീര്ത്തവരെ പോലീസ് ആക്രമിച്ചത് വലിയ വിവാദങ്ങള്ക്ക് ഇടവച്ചു. അതേ പോലീസ് തന്നെ ഇന്നലെ അഭിഭാഷക കമ്മീഷന് സഹായം നല്കാതിരിക്കുകയും ചെയ്തു. 8 ദളിത് കുടുംബങ്ങളാണ് മലയിടംതുരുത്ത് പാരിയത്തുകാവില് കുടിയൊഴിപ്പിക്കല് ഭീഷണി നേരിടുന്നത്. ഇവരെ സഹായിക്കാന് എന്ന വ്യാജേന പ്രതിഷേധ സമരത്തിനുള്ള ഇടമാക്കി മാറ്റി ചില ഇടത് സംഘടനകള് ഇവര്ക്കൊപ്പമുണ്ട്.
അതിനിടെ സര്ക്കാര് കോടതിയെ സമീപിക്കും എന്ന് പറയുമ്പോഴും സുപ്രീംകോടതിയുടെ മുന്നിലിരിക്കുന്ന ഈ കേസില് അന്തിമവിധി എന്താകുമെന്നതില് ആശങ്ക നിലനില്ക്കുകയാണ്.
