തൃശൂര്: ഗ്രൂപ്പ് ഘട്ടത്തിലേറ്റ തോല്വിക്ക് റിയല് മലബാര് എഫ്സിയോട് പകരംവീട്ടി കാലിക്കറ്റ് എഫ്സി. തൃശൂര് കോര്പ്പറേഷന് സ്റ്റേഡിയത്തില് നടന്ന കേരള പ്രീമിയര് ലീഗ് (കെപിഎല്) 2025-26 സൂപ്പര് എട്ട് പോരാട്ടത്തില് എതിരില്ലാത്ത രണ്ട് ഗോളുകള്ക്കായിരുന്നു കോഴിക്കോടിന്റെ സ്വന്തം ടീമിന്റെ ജയം. ടീമിനായി അര്പ് കോന്യാക് (18′), മനോജ് (56′) എന്നിവര് ഗോളുകള് നേടി. സൂപ്പര് 8 ഘട്ടത്തിലെ ഇതുവരെയുള്ള എല്ലാ മത്സരങ്ങളും ജയിച്ച ടീം ഒന്നാം സ്ഥാനത്ത് തുടരുകയാണ്.
18-ാം മിനിറ്റില് ലാല്സ്വമ്പ്യൂയ എടുത്ത കോര്ണര് കിക്ക് ഹാഷിര് ഹെഡറിലൂടെ അര്പ് കോന്യാകിന് മറിച്ചുനല്കി. പന്ത് കോന്യാക് യാതൊരു പിഴവുമില്ലാതെ വലയിലേക്ക് ചെത്തിയിട്ടതോടെ കാലിക്കറ്റിന് അര്ഹിച്ച ലീഡ് (1-0).
ആദ്യ ഗോള് വഴങ്ങിയതോടെ ഉണര്ന്നുകളിച്ച റിയല് മലബാര് സമനിലയ്ക്കായി കിണഞ്ഞുശ്രമിച്ചു. രണ്ടാം പകുതിയുടെ തുടക്കത്തില് ഇരുടീമുകളും കരുതലോടെയാണ് പന്തുതട്ടിയത്. എന്നാല് 55-ാം മിനിറ്റില് കളി മാറിമറിഞ്ഞു. സ്വന്തം പകുതിയില് നിന്ന് പന്തുമായി കുതിച്ച കാലിക്കറ്റിന്റെ ഷംനാദിനെ പെനാല്റ്റി ഏരിയയ്ക്ക് തൊട്ടരികില് വെച്ച് റിയല് മലബാര് പ്രതിരോധം വീഴ്ത്തി.
തുടര്ന്ന് ലഭിച്ച ഫ്രീകിക്ക് എടുത്തത് ഹാഷിര്. ഹാഷിറിന്റെ തകര്പ്പന് ഷോട്ട് റിയല് മലബാര് ഗോളി തടുത്തുമാറ്റിയെങ്കിലും പന്ത് കൈപ്പിടിയിലൊതുക്കാന് കഴിഞ്ഞില്ല. റീബൗണ്ട് ചെയ്തുവന്ന പന്തിനായി കാത്തുനിന്ന കാലിക്കറ്റ് പ്രതിരോധതാരം മനോജ് വലയിലാക്കി (2-0).
വിജയക്കുതിപ്പ് തുടരുന്ന കാലിക്കറ്റ് എഫ്സിയുടെ സൂപ്പര് എട്ടിലെ അവസാന മത്സരം മെയ് 26 ന് രാത്രി എട്ടിന്
തൃശൂര് കോര്പ്പറേഷന് സ്റ്റേഡിയത്തില് വമ്പന്മാരായ ഗോകുലം കേരള എഫ്സിക്കെതിരെയാണ്.
