കൊച്ചി: സൂപ്പര് ലീഗ് കേരള ടീം കാലിക്കറ്റ് എഫ്സി കേരള പ്രീമിയര് ലീഗില്(കെപിഎല്) കരുത്തറിയിക്കും. കോര്പ്പറേറ്റ് എന്ട്രിയിലൂടെയാണ് കാലിക്കറ്റ് എഫ്സി കെപിഎല്ലില് അരങ്ങേറ്റം കുറിക്കുന്നത്.
കാലിക്കറ്റ് എഫ്സിക്ക് പുറമേ, കെപിഎല് രണ്ടാം ഡിവിഷനില് നിന്ന് സ്ഥാനക്കയറ്റം ലഭിച്ച ഇഎംഇഎ കോളജ്, സായ് കൊല്ലം എന്നീ ടീമുകളാണ് ലീഗിലെ മറ്റു പുതുമുഖക്കാര്. ഞായറാഴ്ച്ച മുതലാണ് കേരള ഫുട്ബോള് അസോസിയേഷന്(കെഎഫ്എ) സംഘടിപ്പിക്കുന്ന കെപിഎല്ലന്റെ 13-ാം സീസണ് ആരംഭിക്കുക. ഉദ്ഘാടന മത്സരത്തില് ഗോകുലം കേരള പുതുമുഖ ടീം കാലിക്കറ്റ് എഫ്സിയുമായി ഏറ്റുമുട്ടും. വൈകീട്ട് ഏഴിനാണ് മത്സരം.
കേരള ബ്ലാസ്റ്റേഴ്സ് എഫ്സി, ഗോള്ഡന് ത്രെഡ്സ് എഫ്സി, റിയല് മലബാര് എഫ്സി, ഇന്റര് കേരള എഫ്സി, കെഎസ്ഇബി, കേരള പോലീസ്, വയനാട് യുണൈറ്റഡ് എഫ്സി, പിഎഫ്സി കേരള, കോവളം എഫ്സി, കേരള യുണൈറ്റഡ് എഫ്സി എന്നിവയാണ് മറ്റു ടീമുകള്. കെപിഎല് ജേതാക്കളാകുന്ന ടീമിനെ ഇന്ത്യന് ഫുട്ബോള് ലീഗ് മൂന്നിലേക്ക് നോമിനേറ്റ് ചെയ്യുമെന്ന് കേരള ഫുട്ബോള് അസോസിയേഷന് പ്രസിഡന്റ് നവാസ് മീരാന്, ജനറല് സെക്രട്ടറി ഷാജി സി. കുര്യന് എന്നിവര് വാര്ത്താസമ്മേളനത്തില് അറിയിച്ചു.
14 ടീമുകളെ എഴ് ടീമുകള് വീതമുള്ള രണ്ട് ഗ്രൂപ്പുകളായി തിരിച്ചാണ് പ്രാഥമിക റൗണ്ട് മത്സരങ്ങള് നടക്കുക. കെഎഫ്എ ട്രഷറര് റജിനോള്ഡ് വര്ഗീസ്, എറണാകുളം ജില്ലാ ഫുട്ബോള് അസോസിയേഷന് സെക്രട്ടറി വിജു ചൂളയ്ക്ക്ല് എന്നിവരും പ്രഖ്യാപന ചടങ്ങില് പങ്കെടുത്തു.
