കളമശേരി: സുസ്ഥിര നിര്‍മാണ രീതികളെ മുന്‍നിര്‍ത്തി വികസിപ്പിച്ച ‘പോസ്റ്റ്-ക്യൂറിങ്ങ് ആല്‍ക്കലി ആക്റ്റിവേറ്റഡ് ഫൈബര്‍ റീഇന്‍ഫോഴ്‌സ്ഡ് ലാറ്ററൈറ്റിക് സോയില്‍ ബില്‍ഡിങ് ബ്ലോക്കുകള്‍” എന്ന പുതിയ നിര്‍മാണ സാങ്കേതികവിദ്യയ്‌ക്ക് കുസാറ്റ് ഗവേഷകര്‍ പേറ്റന്റ് നേടി. സുലഭമായി ലഭ്യമായ ലാറ്ററൈറ്റിക് മണ്ണും ഫൈബര്‍ മാലിന്യ വസ്തുക്കളും ഉപയോഗിച്ച് കൂടുതല്‍ ശക്തിയേറിയതും ഈടു നില്‍ക്കുന്നതുമായ പരിസ്ഥിതി സൗഹൃദ നിര്‍മാണ ബ്ലോക്കുകള്‍ തയ്യാറാകുന്നതാണ് ഈ സാങ്കേതികവിദ്യയുടെ പ്രത്യേകത.
പരമ്പരാഗത രീതികളില്‍ ബ്ലോക്ക് നിര്‍മാണ സമയത്ത് തന്നെ സാന്ദ്ര ആല്‍ക്കലി ദ്രാവകങ്ങള്‍ ചേര്‍ക്കുമ്പോള്‍, പുതിയ രീതിയില്‍ ബ്ലോക്കുകള്‍ ആദ്യം ക്യൂറിങ്ങ്് നടത്തിയ ശേഷം നിയന്ത്രിത ആല്‍ക്കലി ദ്രാവകത്തില്‍ മുക്കി വീണ്ടും ഈ പ്രൊ
സസ് നടത്തുന്നു. പരിശോധനകളില്‍ ഈ പ്രക്രിയ ബ്ലോക്കുകളുടെ കംപ്രഷന്‍ ശക്തി ഗണ്യമായി വര്‍ധിപ്പിക്കുന്നതും, വെള്ളം ആഗിരണം ചെയ്യുന്നത് കുറയ്‌ക്കുന്നതും, എഫ്‌ലോറസന്‍സ് ഒഴിവാക്കുന്നതുമായി കണ്ടെത്തി.
കൂടാതെ നിര്‍മാണ ഘട്ടത്തില്‍ തൊഴിലാളികള്‍ക്ക് കാഠിന്യമുള്ള ആല്‍ക്കലി നേരിട്ട് കൈകാര്യം ചെയ്യേണ്ട സാഹചര്യം ഒഴിവാകുന്നതിനാല്‍ തൊഴില്‍ സുരക്ഷയും മെച്ചപ്പെടുന്നു. പ്രാദേശികമായി ധാരാളമായി ലഭ്യമായ ലാറ്ററൈറ്റിക് മണ്ണ് പ്രയോജനപ്പെടുത്തി ചെലവ് കുറഞ്ഞതും പരിസ്ഥിതി സൗഹൃദവുമായ നിര്‍മ്മാണ സാമഗ്രികള്‍ വികസിപ്പിക്കാന്‍ ഈ സാങ്കേതികവിദ്യ സഹായകരമാകുമെന്ന് ഗവേഷകര്‍ വിലയിരുത്തുന്നു. കുസാറ്റ് സ്‌കൂള്‍ ഓഫ് എന്‍ജിനീയറിങ്ങിലെ പ്രൊഫ. ഡോ. ദീപ ജി. നായര്‍, റിസര്‍ച്ച് സ്‌കോളറായിരുന്ന ഡോ. എം.ജി. ശ്രീകുമാര്‍ എന്നിവരാണ് ഈ പേറ്റന്റിനു പിന്നില്‍. ഡോ. എം.ജി. ശ്രീകുമാര്‍ കൊച്ചി ആകാശവാണിയില്‍ അസിസ്റ്റന്റ് എന്‍ജിനീയറായി പ്രവര്‍ത്തിച്ചുവരുന്നു.
