ലോകം കാത്തിരിക്കുന്ന ഫുട്ബോള് മാമാങ്കത്തിന് ഇനി 20 നാള് കൂടി. അങ്കത്തട്ടില് കേറാനുള്ള യോദ്ധാക്കളുടെ അന്തിമ പട്ടിക ഓരോ ടീമും പ്രഖ്യാപിച്ചുകൊണ്ടിരിക്കുന്നു. ബ്രസീല്, പോര്ച്ചുഗല്, ജര്മനി, ഈജിപ്ത്, ക്രൊയേഷ്യ, സ്വിറ്റ്സര്ലന്ഡ് ടീമുകള് ഇതിനോടകം ടീമിനെ പ്രഖ്യാപിച്ചുകഴിഞ്ഞു. വമ്പന്മാരും ചെറുമീനുകളുമായി ഇനിയുമേറെ ടീമുകള് അന്തിമ ടീമുകളെ പ്രഖ്യാപിക്കാനുണ്ട്. ഓരോ ടീമിനും പരമാവധി 26 താരങ്ങളെയാണ് ഉള്പ്പെടുത്താനാകുക. ഇതിനായുള്ള ടീമുകളുടെ അവസാനവട്ട ക്യാമ്പുകളും മറ്റും ലോകത്തിന്റെ വിവിധ ഇടങ്ങളിലായി നടന്നുവരികയാണ്.
ചരിത്രത്തില് ആദ്യമായാണ് 48 ടീമുകള് അണിനിരക്കുന്ന ലോകകപ്പ് ഫുട്ബോളിന് ലോകം സാക്ഷിയാകുന്നത്. 1998 മുതല് കഴിഞ്ഞ തവണ ഖത്തറില് നടന്ന ലോകകപ്പ് വരെ 32 ടീമുകളായിരുന്നു. ടീമുകളുടെ എണ്ണം കൂടിയപ്പോള് നോക്കൗട്ടിലെ ഒരു ഘട്ടം അധികമായെന്ന് മാത്രം കൂടാതെ മത്സരങ്ങളുടെ എണ്ണം നൂറ് കവിയുകയും ചെയ്തു. 12 ഗ്രൂപ്പുകളില് ഓരോന്നിലും നാല് വിതം ടീമുകള്.
റൗണ്ട് റോബിന് സംവിധാനത്തിലുള്ള ഗ്രൂപ്പ് ഘട്ട മത്സരങ്ങളില് മുന്നിലെത്തുന്ന രണ്ട് ടീമുകളും മൊത്തം ഗ്രൂപ്പുകളില് നിന്ന് മികച്ച മൂന്നാം സ്ഥാനക്കാരായി ഫിനിഷ് ചെയ്യുന്ന എട്ട് ടീമുകളും ആണ് നോക്കൗട്ടിലേക്ക് മുന്നേറുക. റൗണ്ട് ഓഫ് 32 മുതല് തോല്ക്കുന്ന ടീമുകള് പുറത്തായിക്കൊണ്ടിരിക്കും. ജൂണ് 11ന് മെക്സിക്കോ സിറ്റിയില് ആരംഭിച്ച് 19ന് ന്യൂജേഴ്സിയില് ഫൈനലോടുകൂടിയാണ് ഫുട്ബോള് പൂരം കൊടിയിറങ്ങുക.
