പാലക്കാട്: കെസിഎ അന്തര് ജില്ലാ അണ്ടര് 19 വനിതാ ക്രിക്കറ്റ് ടൂര്ണമെന്റിലെ വടക്കന് മേഖല മത്സരങ്ങളില് മലപ്പുറത്തിനും കണ്ണൂരിനും വിജയം. മലപ്പുറം കോഴിക്കോടിനെ ഏഴ് വിക്കറ്റിനും കണ്ണൂര് കാസര്ഗോഡിനെ ഒന്പത് വിക്കറ്റിനുമാണ് തോല്പ്പിച്ചത്. ടൂര്ണമെന്റില് കോഴിക്കോടിന്റെയും കാസര്ഗോഡിന്റെയും തുടര്ച്ചയായ രണ്ടാം തോല്വിയാണിത്.
കണ്ണൂരിനെതിരെ ആദ്യം ബാറ്റ് ചെയ്ത കാസര്ഗോഡ് 28.3 ഓവറില് 80 റണ്സിന് ഓള് ഔട്ടാവുകയായിരുന്നു. 20 റണ്സെടുത്ത നബ ഫാത്തിമയും 17 റണ്സെടുത്ത ക്യാപ്റ്റന് റിതികയും മാത്രമാണ് കാസര്ഗോഡ് നിരയില് രണ്ടക്കം കണ്ടത്. കണ്ണൂരിന് വേണ്ടി തീര്ത്ഥ മൂന്നും അയോന, അരിത, സൗമ്യ എന്നിവര് രണ്ട് വിക്കറ്റ് വീതവും വീഴ്ത്തി. മറുപടി ബാറ്റിങ്ങിന് ഇറങ്ങിയ കണ്ണൂര് 14.3 ഓവറില് ഒരു വിക്കറ്റ് നഷ്ടത്തില് ലക്ഷ്യത്തിലെത്തി. 39 റണ്സുമായി പുറത്താകാതെ നിന്ന അനുഷ്കയുടെ ഇന്നിങ്സാണ് കണ്ണൂരിന് അനായാസ വിജയം സമ്മാനിച്ചത്.
മേഖലയിലെ മറ്റൊരു മത്സരത്തില് മലപ്പുറം കോഴിക്കോടിനെ ഏഴ് വിക്കറ്റിനാണ് തോല്പ്പിച്ചത്. ടോസ് നേടി ആദ്യം ബാറ്റ് ചെയ്ത കോഴിക്കോട് 30 ഓവറില് ഏഴ് വിക്കറ്റ് നഷ്ടത്തില് 110 റണ്സെടുത്തു. 37 റണ്സെടുത്ത നയനിക മാത്രമാണ് കോഴിക്കോടിന് വേണ്ടി മികച്ച പ്രകടനം കാഴ്ചവച്ചത്. മലപ്പുറത്തിന് വേണ്ടി വൈഗയും ദിവ്യയും രണ്ട് വിക്കറ്റ് വീതം വീഴ്ത്തി. മറുപടി ബാറ്റിങ്ങിന് ഇറങ്ങിയ മലപ്പുറം 11 ഓവറുകള് ബാക്കി നില്ക്കെ ലക്ഷ്യത്തിലെത്തി. 34 റണ്സെടുത്ത അക്ഷയയും 33 റണ്സെടുത്ത വൈഗയുമാണ് മലപ്പുറത്തിന്റെ ബാറ്റിങ് നിരയില് തിളങ്ങിയത്.
