ദുബായ്: ദുബായ് ചേംബേഴ്‌സിന് കീഴിലുള്ള ദുബായ് ചേംബര്‍ ഓഫ് കൊമേഴ്‌സില്‍ 2026 ന്റെ ആദ്യ പാദത്തില്‍ 3,995 പുതിയ ഭാരത കമ്പനികള്‍ അംഗത്വം നേടിയതായി ഭാരവാഹികള്‍ അറിയിച്ചു. ഇതോടെ സജീവ അംഗത്വമുള്ള ദുബായിലെ ഭാരത കമ്പനികളുടെ എണ്ണം 84,088 ആയി ഉയര്‍ന്നു.
ആഗോള വ്യാപാര മേഖല കൂടുതല്‍ സങ്കീര്‍ണമാകുന്ന സാഹചര്യത്തിലും ഭാരത കമ്പനികള്‍ ദുബായിയെ വിശ്വസനീയ ആഗോള വ്യാപാര-നിക്ഷേപ കേന്ദ്രമായി കാണുന്നതിന്റെ തെളിവാണിതെന്നും അവര്‍ വ്യക്തമാക്കി. ബിസിനസ് തുടര്‍ച്ച, ആഗോള വികസനം, ദീര്‍ഘകാല വളര്‍ച്ച എന്നിവയ്‌ക്ക് അനുയോജ്യമായ അന്തരീക്ഷമാണ് ദുബായ് ഒരുക്കുന്നത്.
ദുബായിയുടെ ദൂരദര്‍ശിയായ ഭരണനയങ്ങളും ശക്തമായ വ്യാപാര അന്തരീക്ഷവും ഭാരത ബിസിനസുകളുടെ ആഗോള വളര്‍ച്ചയ്‌ക്ക് നിര്‍ണായകമാണെന്ന് ദുബായ് ചേംബേഴ്‌സ് പ്രസിഡന്റും സിഇഒയുമായ മുഹമ്മദ് അലി റാഷിദ് ലൂത്ത, ജോയ് ആലുക്കാസ് ഗ്രൂപ്പ് സിഎംഡി ഡോ. ജോയ് ആലുക്കാസ്, ഇന്ത്യന്‍ ബിസിനസ് ആന്റ് പ്രൊഫഷണല്‍ കൗണ്‍സില്‍ ചെയര്‍മാന്‍ സിദ്ധാര്‍ത്ഥ് ബാലചന്ദ്രന്‍, ആപ്പ്‌കോര്‍പ് ഹോള്‍ഡിംഗ് ചെയര്‍മാനും അപ്പാരല്‍ ഗ്രൂപ്പ് ഉടമയുമായ നിലേഷ് വേദ് എന്നിവരും അഭിപ്രായപ്പെട്ടു.
