കോതമംഗലം: നെല്ലിക്കുഴിയില് അമീബിക് മസ്തിഷ്ക ജ്വരം പിടിപെട്ട് വൃദ്ധ മരിച്ച സംഭവത്തില് ബാക്ടീരിയയുടെ ഉറവിടം കണ്ടെത്താനായില്ല. ഉറവിടം കണ്ടെത്താനായി ആരോഗ്യവകുപ്പ് തീവ്രശ്രമം ആരംഭിച്ചു. കൃഷിയിടങ്ങളിലെ പണികള് ഉള്പ്പടെ ചെയ്യുന്ന 73കാരിയാണ് രോഗം പിടിപ്പെട്ട് മരിച്ചത്. സ്വകാര്യ ആശുപത്രിയില് കഴിയവെ 15നായിരുന്നു മരണം.
സംസ്ഥാനത്തെ മറ്റിടങ്ങളില് മസ്തിഷ്കജ്വരം പിടിപ്പെട്ടത് കുളങ്ങളിലും മറ്റും കുളിച്ചവര്ക്കര്ക്കായിരുന്നു. നെല്ലിക്കുഴിയില് മരിച്ച വൃദ്ധ പൊതുജലസ്രോതസുകളില് കുളിക്കുന്ന ശീലമില്ലാത്തയാളാണ്. വീട്ടില് ചൂടുവെള്ളത്തിലാണ് സാധാരണയായി കുളിക്കുന്നത്.
ഈ സാഹചര്യം രോഗത്തിന്റെ ഉറവിടം കണ്ടെത്താന് ആരോഗ്യവകുപ്പിനെ ബുദ്ധിമുട്ടിലാക്കുകയാണ്. വീടും പരിസരവും ആരോഗ്യവകുപ്പ് ഉദ്യോഗസ്ഥര് സന്ദര്ശിച്ചിരുന്നു. വൃദ്ധ സമീപകാലത്ത് പോയ സ്ഥലങ്ങളുടെ വിശദാംശങ്ങളും വീട്ടുകാരില് നിന്ന് ശേഖരിച്ചു. തീര്ത്ഥാടന കേന്ദ്രങ്ങളിലെ പള്ളികളിലുള്പ്പെടെ അവര് സന്ദര്ശനം നടത്തിയിരുന്നു. പനി പിടിപ്പെട്ടതിനെതുടര്ന്നാണ് വൃദ്ധയെ കോതമംഗലത്തെ ആശുപത്രിയിലെത്തിച്ചത്. ചികിത്സ നടക്കുന്നതിനിടെ ലക്ഷണങ്ങള് ഉണ്ടായിരുന്നെങ്കിലും അമീബിക് മസ്തിഷ്കജ്വരം ആണെന്ന് ഡോക്ടര്മാര് സ്ഥിരീകരിച്ചിരുന്നില്ല.
പിന്നീടാണ് ഇക്കാര്യത്തില് ആരോഗ്യവകുപ്പിന്റെ സ്ഥിരീകരണം ഉണ്ടായത്. വൃദ്ധയുടെ മരണവും രോഗവും സംബന്ധിച്ച് ജാഗ്രതാ നിര്ദേശമൊന്നും ആരോഗ്യവകുപ്പ് നല്കിയിട്ടില്ലെന്ന് ബന്ധുക്കള് പറഞ്ഞു.
