കൊച്ചി: മലയാളത്തിലെ ആദ്യത്തെ സമ്പൂര്ണ എഐ ചിത്രവും ഭാരതത്തിലെ ആദ്യത്തെ ആര്ട്ട് ഹൗസ് എഐ സിനിമയുമായ വാഗ്ദത്ത ഭൂമി റിലീസിന് ഒരുങ്ങുന്നു. വാലപ്പന് ക്രിയേഷന്സിന്റെ ബാനറില് ഒരുങ്ങുന്ന ചിത്രത്തിന്റെ ട്രെയിലര് ലോഞ്ച് കൊച്ചി ചാവറ കള്ച്ചറല് സെന്ററില് നടന്നു.
സിദ്ധിക്ക് പറവൂരാണ് ചിത്രത്തിന്റെ രചന, ആനിമേഷന്, സംവിധാനം എന്നിവ നിര്വഹിച്ചിരിക്കുന്നത്. പൂര്ണമായും എഐ സാങ്കേതികവിദ്യ പ്രയോജനപ്പെടുത്തിയാണ് സിനിമ തയാറാക്കിയിരിക്കുന്നതെന്ന് അണിയറ പ്രവര്ത്തകര് പറഞ്ഞു. വാലപ്പന് ക്രിയേഷന്സിന്റെ നാലാമത്തെ നിര്മാണ സംരംഭമാണിത്. മണ്ണിനോടുള്ള ഒരു കര്ഷകന്റെ ആത്മബന്ധവും ആധുനിക കാലത്തെ യുവതലമുറയുടെ വിദേശ കുടിയേറ്റവും തമ്മിലുള്ള ആത്മസംഘര്ഷവുമാണ് ചിത്രത്തിന്റെ പ്രധാന പ്രമേയം.
ചടങ്ങില് നിര്മാതാവും സിനിമയിലെ അഭിനേതാവുമായ ഷാജു വാലപ്പന്, നടി ഡോ. അനശ്വര, ഡി.ഒ.പി ജലീല് ബാദുഷ, തേക്കിന്കാട് ജോസഫ്, ലിന്സി ഷാജു വാലപ്പന് എന്നിവരും പങ്കെടുത്തു. ബ്ലാക്ക് ആന്ഡ് വൈറ്റ് കളര് തീമിലാണ് സിനിമ പൂര്ണമായും നിര്മിച്ചിരിക്കുന്നതെന്നും ഭാവിയിലെ ഇത്തരം സിനിമകള്ക്ക് ഒരു വഴികാട്ടിയായി ചിത്രം മാറുമെന്നും സംവിധായകന് പറഞ്ഞു.
