കോട്ടയം: രാജ്യത്ത്, തെക്കന്‍ സംസ്ഥാനങ്ങളിലും വടക്കുകിഴക്കന്‍ മേഖലയിലും ശക്തമായ മഴ തുടരുമ്പോള്‍ ഉത്തര ഭാരതത്തില്‍ അതിശക്തമായ ചൂടാണ്. ചൊവ്വാഴ്ച രാവിലെ വരെയുള്ള കണക്കുകളനുസരിച്ച് കേരളം, മാഹി എന്നിവിടങ്ങളില്‍ ഇടവിട്ട മഴ തുടരുകയാണ്.
കര്‍ണാടകയുടെ തീരപ്രദേശം, ലക്ഷദ്വീപ്, കൊങ്കണ്‍, ഗോവ, തമിഴ്‌നാട്, റായലസീമ, ഒഡിഷ തുടങ്ങിയ മേഖലകളിലും മഴപ്പെയ്‌ത്തുണ്ട്. അസം, മേഘാലയ, അരുണാചല്‍ പ്രദേശ്, ത്രിപുര, ആന്‍ഡമാന്‍ നിക്കോബാര്‍ ദ്വീപുകള്‍ എന്നിവിടങ്ങളിലും മഴ ലഭിക്കുന്നു.
അറബിക്കടലിലും ബംഗാള്‍ ഉള്‍ക്കടലിലും രൂപപ്പെട്ട ഈര്‍പ്പമുള്ള കാറ്റാണ് തെക്കന്‍ സംസ്ഥാനങ്ങളില്‍ മഴ ശക്തമാകാന്‍ കാരണമെന്ന് കാലാവസ്ഥാ വിദഗ്ധര്‍ വിലയിരുത്തുന്നു. കേരള തീരത്തും ലക്ഷദ്വീപ് മേഖലയിലും ശക്തമായ പടിഞ്ഞാറന്‍ കാറ്റ് തുടരുന്നത് അടുത്ത ദിവസങ്ങളിലും മഴ ശക്തമാകാന്‍ കാരണമാകും. ആന്‍ഡമാന്‍ കടലിലും തെക്കു കിഴക്കന്‍ ബംഗാള്‍ ഉള്‍ക്കടലിലും മഴ വ്യാപകമായത് തെക്കുപടിഞ്ഞാറന്‍ മണ്‍സൂണിന്റെ പുരോഗതിക്ക് സഹായകരമാണെന്ന് സ്വകാര്യ കാലാവസ്ഥാ നിരീക്ഷകരായ മെറ്റ്ബീറ്റ് വെതര്‍ സൂചിപ്പിക്കുന്നു.
ഉത്തര ഭാരതത്തിലെ പല സംസ്ഥാനങ്ങളിലും ചൂട് കനക്കുകയാണ്. ഉത്തര്‍പ്രദേശിലെ ബണ്ടയില്‍ രാജ്യത്തെ ഏറ്റവും ഉയര്‍ന്ന താപനിലയായ 47.6 ഡിഗ്രി സെഷ്യസ് രേഖപ്പെടുത്തി. ജമ്മു-കശ്മീര്‍, ഹിമാചല്‍പ്രദേശ്, മധ്യപ്രദേശ് തുടങ്ങിയ ഇടങ്ങളില്‍ സാധാരണയേക്കാള്‍ അഞ്ച് ഡിഗ്രിയിലധികമാണ് താപനില. ദല്‍ഹി, ഹരിയാന, മഹാരാഷ്‌ട്രയിലെ ചില മേഖലകള്‍, വിദര്‍ഭ, മറാത്ത്‌വാഡ എന്നിവിടങ്ങളിലും താപനില സാധാരണയേക്കാള്‍ മൂന്ന് മുതല്‍ അഞ്ചുവരെ ഡിഗ്രി കൂടുതലാണ്. ഉത്തരഭാരതത്തില്‍ പലയിടത്തും പകല്‍ ചൂടിനൊപ്പം രാത്രിയിലെ താപനിലയും ഉയര്‍ന്നു നില്‍ക്കുന്നു. മധ്യപ്രദേശ്, രാജസ്ഥാന്‍, ഗുജറാത്ത്, ഉത്തര്‍പ്രദേശ് തുടങ്ങിയ സംസ്ഥാനങ്ങളില്‍ രാത്രി താപനില സാധാരണയേക്കാള്‍ വളരെ കൂടുതലാണ്. കേരളം, കര്‍ണാടകം, ലക്ഷദ്വീപ് തുടങ്ങിയ മേഖലകളില്‍ രാത്രി താപനില സാധാരണ നിലയില്‍ തുടരുന്നെങ്കിലും അന്തരീക്ഷത്തില്‍ ഈര്‍പ്പം കൂടുതലുള്ളതിനാല്‍ അസ്വസ്ഥത അനുഭവപ്പെടുന്ന കാലാവസ്ഥയാണ്.
