തൃശൂര്: തിരുവനന്തപുരത്തേക്കുള്ള യാത്രയ്ക്കിടെ തൃശൂര് റെയില്വെ സ്റ്റേഷനിലെത്തിയ ഗവര്ണര് രാജേന്ദ്ര വിശ്വനാഥ് ആര്ലേക്കറെ ആകര്ഷിച്ച് ഷാഹിനയുടെ മനോഹരമായ കരകൗശല ഉത്പന്നങ്ങള്. പാഴ്വസ്തുക്കള് കൊണ്ടുണ്ടാക്കിയ അതിമനോഹരമായ കരകൗശല വസ്തുക്കളാണ് പ്രധാനമന്ത്രി നരേന്ദ്ര മോദിയുടെ ആശയമായ ഒരു സ്റ്റേഷന്, ഒരുത്പന്നം പദ്ധതിക്കു കീഴില് തൃശൂര് റെയില്വെ സ്റ്റേഷനില് ഷാഹിന വില്പനക്കൊരുക്കിയിരിക്കുന്നത്. മലപ്പുറം കൊണ്ടോട്ടി സ്വദേശിയാണ് ഷാഹിന.
കവുങ്ങിന്പാള, അടയ്ക്കാത്തൊണ്ട്, ചോളത്തൊലി തുടങ്ങിയവ കൊണ്ട് മനോഹരമായ പൂക്കളും മാലകളും മറ്റു കരകൗശല വസ്തുക്കളും തീര്ത്തിരിക്കുന്നു. ഗവര്ണര് ഉത്പന്നങ്ങള് ഓരോന്നും കൗതുകത്തോടെ പരിശോധിച്ചു.
ഒട്ടേറെ സാധനങ്ങള് വാങ്ങി. ഈ രംഗത്തുള്ളവര്ക്ക് കൂടുതല് പ്രോത്സാഹനം വേണമെന്നും ഉത്പന്നങ്ങള് വിറ്റഴിക്കാനുള്ള സംവിധാനങ്ങള് കുറച്ചുകൂടി വിപുലമാക്കണമെന്നും ഷാഹിന ഗവര്ണറോട് അഭ്യര്ത്ഥിച്ചു. ഇക്കാര്യങ്ങള് സര്ക്കാരിന്റെ ശ്രദ്ധയില്പ്പെടുത്താമെന്ന് ഉറപ്പുനല്കിയാണ് ഗവര്ണര് മടങ്ങിയത്. 15 വര്ഷമായി കരകൗശല നിര്മാണത്തിലേര്പ്പെടുന്നയാളാണ് ഷാഹിന.
തൃശൂര് റെയില്വെ സ്റ്റേഷനില് 15 ദിവസത്തെ പ്രദര്ശനമാണ് ഇവര് ഒരുക്കിയത്. വടകര ഇരിങ്ങല് സര്ഗാലയയില് ഷാഹിനയുടെ ഉത്പന്നങ്ങള് ലഭിക്കും.
