തിരുവനന്തപുരം : സില്‍വര്‍ലൈന്‍ പദ്ധതി പിന്‍വലിക്കണമെന്നാവശ്യപ്പെട്ട് ജനകീയ സമരസമിതി മുഖ്യമന്ത്രിക്ക് നിവേദനം നല്‍കി . ഏഴ് വര്‍ഷത്തോളമായി തുടരുന്ന ദുരിതത്തിന് അറുതി വേണമെന്നാണ് ആവശ്യം. അടുത്ത മന്ത്രിസഭായാഗത്തില്‍ പരിഗണിക്കും എന്ന് മുഖ്യന്ത്രി ഉറപ്പുനല്‍കിയതായി ജനകീയ സമരസമിതി അറിയിച്ചു.
സമരസമിതിക്കൊപ്പം നിന്ന രാഷ്‌ട്രീയ കക്ഷികളും നേതാക്കളുമാണ് ഇപ്പോള്‍ ഭരണത്തില്‍.ജനങ്ങളുടെ ബുദ്ധിമുട്ടുകള്‍ നേരിട്ട് മനസിലാക്കിയ മുഖ്യമന്ത്രി പദ്ധതി പിന്‍വലിച്ച് ഉത്തരവിറക്കണമെന്നാണ് ജനകീയ സമിതി നിവേദനത്തില്‍ ആവശ്യപ്പെട്ടിട്ടുള്ളത്.
ജനങ്ങളെ ദ്രോഹിച്ച് വന്‍കിട പദ്ധതി നടപ്പിലാക്കാനുള്ള സര്‍ക്കാര്‍ നീക്കത്തിനെതിരെ തൃക്കാക്കര ഉപതെരഞ്ഞെടുപ്പ് മുതല്‍ ഇക്കഴിഞ്ഞ നിയമസഭാ തിരഞ്ഞെടുപ്പ് വരെ സമരസമിതി ജനങ്ങള്‍ക്കിടയില്‍ പ്രചാരണം നടത്തി. ശക്തമായ പ്രതിഷേധത്തില്‍ പദ്ധതി പ്രവര്‍ത്തനങ്ങള്‍ മുന്നോട്ടുകൊണ്ടുപോകാന്‍ കഴിയാതെ പരാജയപ്പെട്ടിട്ടും പദ്ധതി പിന്‍വലിക്കണമെന്ന ജനങ്ങളുടെ ആവശ്യം അംഗീകരിക്കാന്‍ കഴിഞ്ഞ സര്‍ക്കാര്‍ തയാറായില്ല.
സില്‍വര്‍ ലൈന്‍ പദ്ധതിക്കായി സ്ഥാപിച്ച മഞ്ഞക്കുറ്റി കാരണം ഇപ്പോഴും നിരവധിപേര്‍ വലയുകയാണ്. സര്‍വേ നടത്തിയ ഭൂമി ക്രയവിക്രയം ചെയ്യാന്‍ സാധിക്കുന്നില്ല.റിയല്‍ എസ്റ്റേറ്റ് മാഫിയ ഭൂമിയുടെ വില കുത്തനെ ഇടിച്ചു താഴ്‌ത്തിയെന്നും ആക്ഷേപമുണ്ട്.
