തിരുവനന്തപുരം: കേരളത്തിന്റെ സത്യപ്രതിജ്ഞാ ചടങ്ങില് ആലപിച്ച വന്ദേമാതരത്തെ ചൊല്ലി പൊതുമരാമത്ത് മുന് മന്ത്രി പി എ മുഹമ്മദ് റിയാസ് ഉയര്ത്തിയ വിവാദ പരാമര്ശങ്ങള് അത്യന്തം ദൗര്ഭാഗ്യകരവും അപലപനീയവുമാണെന്ന് ബിജെപി സംസ്ഥാന ജനറല് സെക്രട്ടറി അനൂപ് ആന്റണി.
രാജ്യത്തിന്റെ സ്വാതന്ത്ര്യസമര ചരിത്രത്തോടും ദേശാഭിമാന വികാരങ്ങളോടും ചേര്ന്നു നില്ക്കുന്ന വന്ദേമാതരത്തെ പോലും മതപരമായ കണ്ണാടി ധരിച്ച് കാണാനുള്ള ശ്രമമാണ് നടത്തിയിരിക്കുന്നത്. ഇന്ത്യയുടെ ദേശീയ ബോധത്തിന്റെ ഭാഗമായ ഗാനത്തെ കുറിച്ച് അനാവശ്യ സംശയങ്ങളും ആശങ്കകളും ഉയര്ത്തുന്നത് സമൂഹത്തില് വിഭജന ചിന്തകള്ക്ക് വഴിവെക്കുന്നതാണ്.
വന്ദേമാതര ഗാനം ഇന്ത്യയുടെ സ്വാതന്ത്ര്യസമര ചരിത്രവുമായി ബന്ധപ്പെട്ടു നില്ക്കുന്ന മഹത്തായ സാംസ്കാരിക പൈതൃകമാണെന്ന സത്യത്തെ മറച്ചുവയ്ക്കാനാവില്ല. മതമൗലികവാദ ശക്തികളെ സന്തോഷിപ്പിക്കാനും ഒരു പ്രത്യേക വോട്ട്ബാങ്കിനെ പ്രീതിപ്പെടുത്താനും വേണ്ടിയുള്ള രാഷ്ട്രീയ നിലപാടായിട്ടാണ് മൊഹമ്മദ് റിയാസിന്റെ പ്രസ്താവനയെ പൊതുസമൂഹം വിലയിരുത്തുന്നതെന്നും അനൂപ് ആന്റണി പറഞ്ഞു.
ദേശീയ വികാരങ്ങളോട് ആദരവില്ലാത്ത ചില തീവ്രവാദ-മൗലികവാദ നിലപാടുകള്ക്ക് മുന്നില് സിപിഎം നിരന്തരം വഴങ്ങിക്കൊടുക്കുന്ന സമീപനത്തിന്റെ തുടര്ച്ചയാണ് ഈ പ്രസ്താവന. വന്ദേമാതരം പോലൊരു ദേശീയ പ്രചോദന ഗാനത്തെ പോലും എതിര്ക്കുന്ന തരത്തിലുള്ള പ്രസ്താവനകള് നടത്തുന്നത് മതമൗലികവാദികളെ പ്രീതിപ്പെടുത്താനുള്ള ശ്രമമാണെന്നത് പകല്പോലെ വ്യക്തമാണ്. ഇത്തരം അപകടകരമായ രാഷ്ട്രീയം കേരളത്തിന്റെ സാമൂഹിക ഐക്യത്തിന് ഗുണകരമല്ലെന്നും അദ്ദേഹം പറഞ്ഞു.
സത്യപ്രതിജ്ഞ പോലുള്ള ഔദ്യോഗിക ചടങ്ങുകളില് ദേശീയ വികാരങ്ങളെ ഉയര്ത്തിപ്പിടിക്കുന്ന കാര്യങ്ങളില് സര്ക്കാര് കൂടുതല് അഭിമാനത്തോടെ നിലകൊള്ളേണ്ടതായിരുന്നു.എന്നാല് അതിനെതിരെ ഭരണഘടനയുടെയും മതനിരപേക്ഷതയുടെയും പേരില് തെറ്റായ ആശങ്കകള് സൃഷ്ടിക്കുന്നത് ഇടതുപക്ഷത്തിന്റെ ഇരട്ടത്താപ്പാണ് വ്യക്തമാക്കുന്നത്.
വന്ദേമാതരത്തിന്റെ 150ാം വാര്ഷികത്തോട് അനുബന്ധിച്ച് അതിന്റെ പൂര്ണരൂപം ആലപിക്കാനും, അതിനെ ആക്ഷേപിക്കുന്നത് ക്രിമിനല് കുറ്റമാണെന്നും കേന്ദ്ര ആഭ്യന്തര മന്ത്രാലയത്തിന്റെ ഉത്തരവുണ്ട്. അത് മുന് മന്ത്രിക്ക് അറിയാത്തതാണോ മനഃപൂര്വം മറന്നതാണോ എന്നും അനൂപ് ആന്റണി ചോദിച്ചു.
ദേശീയ ഗാനങ്ങളെയും ദേശീയ ചിഹ്നങ്ങളെയും ആദരിക്കുന്നതില് കേരളം ഒരിക്കലും പിന്നോട്ടുപോകരുത്. രാഷ്ട്രീയ ലാഭത്തിനായി ദേശാഭിമാനത്തെ സംശയത്തിന്റെ നിഴലിലാക്കുന്ന സമീപനം അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
മുഖ്യമന്ത്രി വി ഡി സതീശന് നയിക്കുന്ന പുതിയ സര്ക്കാര് വികസനത്തിലും ജനക്ഷേമത്തിലും ശ്രദ്ധ കേന്ദ്രീകരിക്കട്ടെയെന്നും ദേശീയ വികാരങ്ങളെ വ്രണപ്പെടുത്തുന്ന അനാവശ്യ വിവാദങ്ങളില് നിന്ന് ഇടതുപക്ഷം വിട്ടുനില്ക്കണമെന്നും അനൂപ് ആന്റണി കൂട്ടിച്ചേര്ത്തു.
