തിരുവനന്തപുരം: ഇത്തവണ എസ്എസ്എല്സി ഫലം പ്രഖ്യാപിച്ചത് 1986ലെ മൂന്നാം റാങ്കുകാരിയെന്ന പ്രത്യേകതയുണ്ട്.1986ലെ എസ്എസ്എല്സി പരീക്ഷയില് സംസ്ഥാനത്ത് മൂന്നാം റാങ്ക് നേടിയ, പൊതുവിദ്യാഭ്യാസ പ്രിന്സിപ്പല് സെക്രട്ടറി ഡോ. ഷര്മിള മേരി ജോസഫ് ആണ് ഇന്ന് എസ്എസ്എല്സി പരീക്ഷാഫലം പ്രഖ്യാപിച്ചത്.
ഫലപ്രഖ്യാപനം സാധാരണഗതിയില് നടത്തുന്നത് വിദ്യാഭ്യാസ മന്ത്രിയാണ്. ഇത്തവണ തെരഞ്ഞെടുപ്പിന് ശേഷം പുതിയ മന്ത്രിസഭ അധികാരമേല്ക്കാന് കാലതാമസം നേരിടുന്ന പശ്ചാത്തലത്തിലാണ് പൊതുവിദ്യാഭ്യാസ പ്രിന്സിപ്പല് സെക്രട്ടറി ഫലം പ്രഖ്യാപനം നടത്തിയത്.
ഇതിനെ ഒരു നിയോഗമായാണ് കാണുന്നതെന്ന് ഷര്മിള മേരി ജോസഫ് മാധ്യമങ്ങളോട് പറഞ്ഞു. ഫലം താന് പ്രഖ്യാപിക്കേണ്ടി വരുമെന്ന് പ്രതീക്ഷിച്ചില്ല. അന്ന് എസ്എസ്എല്സി പരീക്ഷയില് നല്ല കടുത്ത മത്സരം ഉണ്ടായിരുന്നു. രാവിലെയും ഉച്ചയ്ക്കുമായിട്ടായിരുന്നു പരീക്ഷ. ബുധനാഴ്ച തുടങ്ങി അടുത്ത ബുധനാഴ്ച തീരുന്ന വിധം ആറു ദിവസമായിരുന്നു പരീക്ഷ. അന്ന് റാങ്ക് കിട്ടുമെന്ന് പ്രതീക്ഷിച്ചിരുന്നുവെന്നും ഷര്മിള മേരി ജോസഫ് പറഞ്ഞു.
ഹോളി ഏഞ്ചല്സ് സ്കൂളിലാണ് പഠിച്ചത്. അന്ന് ആദ്യ മൂന്ന് റാങ്കും പെണ്കുട്ടികളാണ് നേടിയത്. ഇപ്പോള് കുട്ടികള്ക്ക് നിരവധി അവസരങ്ങള് ഉണ്ട്. അവ വേണ്ട പോലെ പ്രയോജനപ്പെടുത്തണം. നന്നായി ലക്ഷ്യബോധത്തോടെ പഠിക്കണമെന്നുമാണ് കുട്ടികള്ക്കായി ഷര്മിള മേരി ജോസഫിന്റെ ഉപദേശം. സ്വപ്നം കാണാനും അത് നേടിയെടുക്കാനും പരിശ്രമിക്കണം. ഡോക്ടര് ആയ ശേഷം എംഡിക്ക് പഠിച്ച് കൊണ്ടിരിക്കെയാണ് ഷര്മിള മേരി ജോസഫിന് ഐ എ എസ് കിട്ടിയത്.
