കൊല്ലം: വനംവകുപ്പിന്റെ സര്‍പ്പ പദ്ധതി വഴി സംസ്ഥാനത്ത് ഇതുവരെ പിടികൂടിയത് 8905 പാമ്പുകളെ. ഇതില്‍ 4188 എണ്ണം മൂര്‍ഖനും 1360 മലമ്പാമ്പും 312 അണലിയുമാണ്. റെസ്‌ക്യൂവര്‍മാര്‍ പിടിച്ചെടുത്ത ശംഖുവരയന്മാരുടെ എണ്ണം 60.
സാധാരണയായി ഒക്ടോബര്‍, നവംബര്‍ മാസങ്ങളിലാണ് നിരവധി പാമ്പുകളെ പിടികൂടാറുള്ളത്. എന്നാല്‍ ജനുവരി മുതല്‍ ഈ മാസം വരെയുള്ള കണക്കുകള്‍ പരിശോധിക്കുമ്പോള്‍ ഓരോ മാസവും രണ്ടായിരത്തിലധികം പാമ്പുകളെ പിടികൂടേണ്ടി വരുന്നതായി സര്‍പ്പ നോഡല്‍ ഓഫീസര്‍ അന്‍വര്‍ പറയുന്നു.
പിടികൂടിയ പാമ്പുകളില്‍ ഒറ്റസംഖ്യയിലുള്ള എണ്ണം രാജവെമ്പാലകള്‍ മാത്രമേയുള്ളൂ. സാധാരണയായി പിടികൂടുന്നവയില്‍ ഇവയുടെ എണ്ണം വളരെ കുറവാണെന്ന് ഉദ്യോഗസ്ഥര്‍ പറയുന്നു. രക്ഷിച്ച പാമ്പുകള്‍ തിരികെ കാട്ടിലെത്തിയപ്പോള്‍ വിഷം തീണ്ടിയുള്ള മരണം കുറഞ്ഞെങ്കിലും സര്‍പ്പ വോളണ്ടിയര്‍മാര്‍ ജാഗ്രതയില്‍ തന്നെയാണ്. നിലവില്‍ ജില്ലയില്‍ പരിശീലനം ലഭിച്ച 47 റെസ്‌ക്യൂവര്‍മാരുണ്ട്. 1360 ചേരകളെയാണ് ഈ വര്‍ഷം ഇതുവരെ കേരളത്തില്‍ നിന്ന് പിടികൂടിയത്. പാമ്പുകളാണ് നിലവില്‍ സ്റ്റാറുകളെങ്കിലും വലിയ ചേരയെ പേടിയുള്ളവരും കൂടുതലാണ്. പാമ്പിനെ പോലെയുള്ള തൊലിയും ഇവയുടെ വലുപ്പവുമാണ് ഇതിന് കാരണമത്രെ. നിരവധി പേരാണ് ചേരയെ പിടിച്ചുതരണമെന്ന് പറഞ്ഞ് ദിനംപ്രതി റെസ്‌ക്യൂവര്‍മാരെ വിളിക്കാറുള്ളത്.
കൊല്ലം ജില്ലയില്‍ ഈ വര്‍ഷം ഇതുവരെ നൂറിലേറെ വിഷപ്പാമ്പുകളെ പിടികൂടി. ഇവയെ സുരക്ഷിത സ്ഥാനങ്ങളിലേക്ക് മാറ്റി. രാജവെമ്പാല, മൂര്‍ഖന്‍, അണലി (ചേനത്തണ്ടന്‍), ശംഖുവരയന്‍ (വെള്ളിക്കെട്ടന്‍) തുടങ്ങിയ ഉഗ്രവിഷമുള്ള പാമ്പുകളാണ് പിടികൂടിയവയില്‍ അധികവും. കഴിഞ്ഞ ജനുവരി മുതല്‍ മെയ് 7 വരെ ആകെ 131 പാമ്പുകളെയാണ് റെസ്‌ക്യൂവര്‍മാര്‍ പിടികൂടിയത്. ഇതില്‍ പെരുമ്പാമ്പ്, നീര്‍ക്കോലി, മോതിര വളയന്‍ തുടങ്ങിയ വിഷമില്ലാത്ത പാമ്പുകളും ഉള്‍പ്പെടുന്നു.
സര്‍പ്പ ആപ്പിനെ കുറിച്ച്…
പാമ്പുകടിയേറ്റുള്ള മരണങ്ങള്‍ കുറയ്‌ക്കാനും ജനവാസ മേഖലകള്‍ക്ക് ഭീഷണിയായ വിഷപ്പാമ്പുകളെ സുരക്ഷിത സ്ഥാനങ്ങളിലേക്ക് മാറ്റാനും 2020 ആഗസ്തില്‍ വനം വകുപ്പ് ആരംഭിച്ച പദ്ധതിയാണിത്. ‘സര്‍പ്പ’ മൊബൈല്‍ ആപ്ലിക്കേഷനിലൂടെയാണ് വോളന്റിയര്‍മാരുടെ സേവനം ലഭ്യമാക്കുന്നത്. പ്ലേസ്റ്റോറില്‍ നിന്ന് ഡൗണ്‍ലോഡ് ചെയ്യാം. സര്‍ട്ടിഫിക്കേഷന്‍ ലഭിച്ച റെസ്‌ക്യൂവര്‍മാരുടെ വിവരങ്ങളും റെസ്‌ക്യൂ പ്രവര്‍ത്തനങ്ങളുടെ ഏകോപനവും ആപ്പിലൂടെയാണ്.
ജന്മഭൂമി ഓണ്‍ലൈന്‍