ന്യൂദല്ഹി: അന്താരാഷ്ട്ര നഴ്സസ് ദിനത്തോടനുബന്ധിച്ച് കേന്ദ്ര ആരോഗ്യ കുടുംബക്ഷേമ മന്ത്രാലയം ഏര്പ്പെടുത്തിയ ദേശീയ ഫ്ലോറന്സ് നൈറ്റിങ്ഗേല് പുരസ്കാരങ്ങള് സമ്മാനിച്ചു. രാഷ്ട്രപതി ഭവനില് നടന്ന ചടങ്ങില് രാഷ്ട്രപതി ദ്രൗപദി മുര്മുവാണ് പുരസ്കാരങ്ങള് സമ്മാനിച്ചത്.
വിലമതിക്കാനാവാത്ത സംഭാവനയ്ക്കുള്ള ഉചിതമായ ആദരവാണിതെന്ന് രാഷ്ട്രപതി അഭിപ്രായപ്പെട്ടു. ഏറ്റവും വെല്ലുവിളി നിറഞ്ഞ സാഹചര്യങ്ങളിലും ഉയര്ന്ന സേവന നിലവാരം പുലര്ത്തുകയും ഗുണനിലവാരമുള്ള ആരോഗ്യസംരക്ഷണം നല്കുന്നതില് നിര്ണായക പങ്ക് വഹിക്കുകയും ചെയ്യുന്നവരാണ് പുരസ്കാരത്തിലൂടെ ആദരിക്കപ്പെടുന്നതെന്നും രാഷ്ട്രപതി കൂട്ടിച്ചേര്ത്തു.
മിലിട്ടറി നഴ്സിങ് സര്വീസ് അഡീ. ഡയറക്ടര് മേജര് ജനറല് ലിസമ്മ പി.വി., തിരുവനന്തപുരം പാങ്ങപ്പാറ ഹെല്ത്ത് സെന്ററിലെ സീനിയര് നഴ്സിങ് ഓഫീസര് വി.എസ്. മഞ്ജുമോള്, ദാദ്ര ആന്ഡ് നഗര് ഹവേലി നമോ ഹോസ്പിറ്റലില് അസി. നഴ്സിങ് സൂപ്രണ്ട് ദീപ ബിജു, ലക്ഷദ്വീപ് ഗവ. ഇന്ദിരാഗാന്ധി ഹോസ്പിറ്റലിലെ നഴ്സിങ് ഓഫീസര് കെ. ആയിഷ ബീബി എന്നിവരടക്കം 15 പേര് പുരസ്കാരങ്ങള് ഏറ്റുവാങ്ങി.
കേന്ദ്ര ആരോഗ്യ കുടുംബക്ഷേമ മന്ത്രി ജെ.പി. നഡ്ഡ, കേന്ദ്രസഹമന്ത്രി പ്രതാപ് റാവു ജാദവ് തുടങ്ങിയവര് ചടങ്ങില് പങ്കെടുത്തു.
