കൊച്ചി : തൊഴില് പീഡന പരാതി നല്കിയ ജീവനക്കാരിയെ പുറത്താക്കിയ നടപടി റദ്ദാക്കിയെന്ന് താര സംഘടന എ എം എം എ. ജീവനക്കാരിയെ പുറത്താക്കിയ നടപടി തെറ്റാണെന്ന് അമ്മ പ്രസിഡന്റ് ശ്വേതാമേനോന് പറഞ്ഞു. കുക്കു പരമേശ്വരനെതിരെ നടപടിയുണ്ടാകില്ല.ജീവനക്കാരി പരാതി ഉന്നയിച്ച ഉണ്ണി ശിവപാലിന് നിര്ബന്ധിത അവധി നല്കി.എ എം എം എ ജോയിന്റ് സെക്രട്ടറി സ്ഥാനത്ത് നിന്നുള്ള അന്സിബയുടെ രാജി സ്വീകരിച്ചെന്നും ശ്വേതാ മേനോന് പറഞ്ഞു.
പരാതിക്കാരിയെ ജോലിയില് നിന്ന് പുറത്താക്കിയ നടപടി തെറ്റാണെന്ന് സംഘടനയുടെ എക്സിക്യൂട്ടീവ് കമ്മിറ്റി യോഗം വിലയിരുത്തിയതായി ശ്വേത മേനോന് മാധ്യമങ്ങളോട് പറഞ്ഞു. എക്സിക്യൂട്ടീവ് യോഗത്തില് പരാതിക്കാരിയെ വിളിപ്പിച്ചു മൊഴി രേഖപ്പെടുത്തി. ഇതിന്റെ അടിസ്ഥാനത്തിലാണ് പുറത്താക്കിയ നടപടി റദാക്കിയത്.
കുറച്ച് ദിവസങ്ങള് മുമ്പാണ് താര സംഘടനയിലെ ഫ്രണ്ട് ഓഫിസ് ജീവനക്കാരി തൊഴില് പീഡന പരാതി ഉന്നയിച്ചത്. പൊലീസിലാണ് ഇവര് ആദ്യം തൊഴില് പീഡന പരാതി നല്കിയത്. ഇതിന്റെ പ്രതികാര നടപടിയെന്നോണം തന്നെ ജോലിയില് നിന്ന് പുറത്താക്കിയെന്നായിരുന്നു പരാതിക്കാരിയുടെ ആരോപണം. ട്രഷറര് ഉണ്ണി ശിവപാലിനെതിരെയാണ് യുവതി ഗുരുതര ആരോപണങ്ങള് ഉന്നയിച്ചത്. സംഭവം വിവാദമായതോടെയാണ് ജീവനക്കാരിയെ പുറത്താക്കിയ നടപടി റദ്ദാക്കിയെന്ന് അറിയിച്ചിരിക്കുന്നത്.
