മലപ്പുറം:ആയുര്വേദ മസാജ് സെന്ററിന്റെ മറവില് പെണ്കെണി ഒരുക്കി യുവാവിനെ മര്ദിച്ച് പണവും സ്വര്ണാഭരണവും തട്ടിയെടുത്ത കേസില് മൂന്നുപേരെ പൊലീസ് അറസ്റ്റ് ചെയ്തു. തിരൂരില് ആണ് സംഭവം.
തിരൂര് ഏറ്റിരിക്കടവ് ഔറാ വെല്നെസ് നടത്തിപ്പുകാരന് തിരുവനന്തപുരം സ്വദേശി സൗദ് (36), കോട്ടയം സ്വദേശിനി ജയന്തി (39), ഓച്ചിറ സ്വദേശിനി വീണ (39) എന്നിവരെയാണ് തിരൂര് പൊലീസ് അറസ്റ്റുചെയ്തത്. വെള്ളിയാഴ്ച രാത്രി 7.30ഓടെ തെക്കന് കുറ്റൂര് കരിമ്പന സ്വദേശി മനോജിനെയാണ് മര്ദിച്ച് പണവും സ്വര്ണവും കവര്ന്നത്.മസാജിനെത്തിയ മനോജിന്റെ കൈവശം കൂടുതല് പണമുണ്ടെന്ന് മനസിലാക്കി
തുടര്ന്ന് പെണ്കെണിയില് പെടുത്തി വിവസ്ത്രനാക്കി ഫോട്ടോയെടുത്തു. മര്ദിച്ചും ഭീഷണിപ്പെടുത്തിയും 28,500 രൂപയും ഒന്നര പവന് സ്വര്ണമാലയും പവര്ബാങ്കും ബൈക്കും കൈക്കലാക്കി. മസാജ് സെന്ററിലെ സ്ത്രീകളെ ഉപദ്രവിച്ചുവെന്ന പരാതിയില് മനോജിനെതിരെയും പൊലീസ് കേസെടുത്തു.
സൗദിന്റെ കൈയില്നിന്ന് മനോജിന്റെ പൊട്ടിയ മാലയും ബൈക്കും കണ്ടെത്തി.കേസിലെ ഒന്നാം പ്രതി മസാജ് സെന്റര് നടത്തിപ്പുകാരനായ സൗദ് പത്തോളം കേസുകളിലെ പ്രതിയാണെന്ന് പൊലീസ് പറഞ്ഞു.
