പാലാ: അവയവമാറ്റത്തിലൂടെ റിവിഷന് ഹിപ് റീപ്ലേസ്മെന്റ് ശസ്ത്രക്രിയ മാര് സ്ലീവാ മെഡിസിറ്റി ഓര്ത്തോപീഡിക്സ് വിഭാഗം വീണ്ടും വിജയകരമായി നടത്തി. പാലാ സ്വദേശിയായ 67 കാരന്റെ കാലപ്പഴക്കം മൂലം ഇളകി മാറിയ 35 വര്ഷം പഴക്കമുള്ള ഇടുപ്പിലെ കൃത്രിമ സന്ധിയാണ് മാറ്റിവെച്ചത്.
ബെംഗളുരുവിലെ രാമയ്യാ മെഡിക്കല് കോളജില് നിന്ന് അവയവമാറ്റ ശസ്ത്രക്രിയയിലൂടെ എത്തിച്ച അല്ലോഗ്രാഫ്റ്റ് ഉപയോഗിച്ച് എല്ലിലുണ്ടായ വലിയ വിടവ് പുനസ്ഥാപിച്ച ശേഷം റിവിഷന് ഇംപ്ലാന്റുകള് ഉപയോഗിച്ച് പുതിയ കൃത്രിമസന്ധി ഘടിപ്പിച്ചായിരുന്നു ശസ്ത്രക്രിയ. ഓര്ത്തോപീഡിക്സ് വിഭാഗം സീനിയര് കണ്സള്ട്ടന്റ് ഡോ. രാജീവ് പി.ബി യുടെ നേതൃത്വത്തിലാണ് നാലു മണിക്കൂര് ശസ്ത്രക്രിയ അല്ലോഗ്രാഫ്റ്റ് ഉപയോഗിച്ചു വിജയകരമാക്കിയത്. വര്ഷങ്ങള്ക്കു മുന്പുണ്ടായ അപകടത്തില് ഇടുപ്പിലെ ഗോളത്തിന് പരിക്കേറ്റതിനെ തുടര്ന്നാണ് 67കാരന് കൃത്രിമ സന്ധി സ്ഥാപിച്ചിരുന്നത്. അടുത്തിടെ അതിശക്തമായ വേദനയെ തുടര്ന്ന് മാര് സ്ലീവാ മെഡിസിറ്റിയില് നടത്തിയ പരിശോധനയില് മുന്പു സ്ഥാപിച്ച കൃത്രിമ സന്ധി ഇളകിയതായി കണ്ടെത്തി.
ചുറ്റുമുള്ള അസ്ഥി കൃത്രിമസന്ധിയിലുള്ള പോളിഎത്തിലീന് ഘടകങ്ങളുടെ പ്രതിപ്രവര്ത്തനം മൂലം ദ്രവിച്ചതായും ശ്രദ്ധയില്പെട്ടു. എല്ലില് ഉണ്ടായ വലിയ വിടവ് നികത്താന് ബെംഗളുരുവില് നിന്നു അവയവമാറ്റത്തിലൂടെയുള്ള അല്ലോഗ്രാഫ്റ്റ് എത്തിക്കുകയായിരുന്നു. ഡോ. രാജീവ് പി.ബി യുടെ നേതൃത്വത്തില് നടത്തിയ ശസ്ത്രക്രിയയില് ഓര്ത്തോപീഡിക്സ് വിഭാഗം മേധാവി പ്രഫ. ഡോ. മാത്യു എബ്രഹാം, ഡോ. സിബിന് സൈഫുദീന്, അനസ്തേഷ്യ വിഭാഗത്തിലെ ഡോ. എബി ജോണ്, ഡോ. ജെയിംസ് സിറിയക്, ഡോ. രേഷ്മ എന്നിവരും പങ്കെടുത്തു. സുഖം പ്രാപിച്ച രോഗി വീട്ടിലേക്ക് മടങ്ങുകയും ചെയ്തു. സന്ധിമാറ്റിവെക്കല് ശസ്ത്രക്രിയകള് സര്വ്വസാധാരണമായതിനാല് ഭാവിയില് ഇത്തരം റിവിഷന് ശസ്ത്രക്രിയകള്ക്കായി അവയവമാറ്റത്തിനായുള്ള അലോഗ്രാഫ്റ്റിന്റെ ആവശ്യകത വര്ധിക്കാന് സാധ്യതയുണ്ട്. ഇതിനാല് രക്തബാങ്കുകള് പോലെ ബോണ് ബാങ്കുകളും സംസ്ഥാനത്ത് സ്ഥാപിക്കേണ്ടതുണ്ടെന്നു ശസ്ത്രക്രിയയ്ക്ക് നേതൃത്വം നല്കിയ ഡോ. രാജീവ് പി.ബി പറഞ്ഞു. നേരത്തെ ബൈക്ക് അപകടത്തില് ഗുരുതര പരിക്കേറ്റ യുവാവിന് അവയമാറ്റത്തിലൂടെ എത്തിച്ച അല്ലോഗ്രാഫ്റ്റ് സ്ഥാപിച്ചു സംസ്ഥാനത്തെ ആദ്യത്തെ കാര്ട്ടിലേജ് ബോണ് കോംപ്ലക്സ് അവയവമാറ്റ ശസ്ത്രക്രിയ മാര് സ്ലീവാ മെഡിസിറ്റിയിലാണ് നടത്തിയിരുന്നത്. അന്നും അല്ലോഗ്രാഫ്റ്റ് കര്ണാടകയിലെ ബോണ് ബാങ്കില് നിന്നും എത്തിക്കുകയായിരുന്നു.
