കണ്ണൂര്: സിപിഎം പയ്യന്നൂര് ഏരിയ നേതൃത്വത്തിനെതിരെ തുറന്നടിച്ച് പോലീസിന് നേരെ ബോംബെറിഞ്ഞ കേസില് ജയിലില് കഴിയുന്ന ടിസിവി നന്ദകുമാറിന്റെ ഭാര്യ. വിഭാഗീയതയില് നേതൃത്വത്തെ കുറ്റപ്പെടുത്തിയും പയ്യന്നൂരിലെ പരാജയം തനിക്കേല്പ്പിച്ച അരക്ഷിതാവസ്ഥയെക്കുറിച്ചും ഏറെ വൈകാരികമായ കുറിപ്പാണ് ശരണ്യ ഫേസ്ബുക്കില് പങ്കുവച്ചിരിക്കുന്നത്.
പയ്യന്നൂരിലെ തോല്വിക്ക് കാരണം നേതൃത്വം തന്നെ പിന്നില് നിന്ന് കുത്തിയത് കൊണ്ടാണെന്ന് ഉറപ്പാണ്. എന്ത് വിശ്വസിച്ചിട്ടാണ് തങ്ങളിനി ജീവിക്കേണ്ടതെന്നും എല്ലാം പാര്ട്ടി നോക്കുമെന്നാണ് വിചാരിച്ചത്, പക്ഷേ ഇപ്പോള് പേടിയാണെന്നും അവര് ഫേസ്ബുക്കില് കുറിച്ചു.
പാര്ട്ടി സ്ഥാനാര്ഥിയെ ഗ്രൂപ്പ് കളിച്ച് തോല്പ്പിക്കാനാകുമെങ്കില് ഇതിനും അവര്ക്ക് കഴിയും. കേസ് കുറെയുണ്ട്. അതെല്ലാം തന്റെ ഭര്ത്താവ് ഉണ്ടാക്കിയത് പാര്ട്ടിക്ക് വേണ്ടിയാണ്. ഇനി തങ്ങളുടെ ഭാവി എന്താകുമെന്നും ശരണ്യ പോസ്റ്റിലൂടെ ആശങ്ക പ്രകടിപ്പിച്ചു.
ഫേക്ക് അക്കൗണ്ടിലൂടെ ജീവിതകാലം മുഴുവന് ജയിലില് കിടത്തുമെന്ന് ട്രോള് വീഡിയോ വരുന്നു.
പോലീസിന് നേരെ ബോംബറിഞ്ഞ കേസില് ജയിലില് കഴിയുന്ന നേതാവാണ് ടിസിവി നന്ദകുമാര്. ജാമ്യത്തിനായി ഹൈക്കോടതിയില് അപേക്ഷ നല്കിയിട്ടുണ്ട്. എന്നാല് അഭിഭാഷകനോട് ജാമ്യം പതിയെ മതിയെന്ന് ഏരിയാ നേതാക്കള് നിര്ദേശിച്ചെന്നാണ് പാര്ട്ടി ഗ്രൂപ്പുകളിലെ ചര്ച്ച. ഈ പശ്ചാത്തലത്തിലാണ് ശരണ്യ നന്ദകുമാറിന്റെ ഫേസ്ബുക്ക് കുറിപ്പ് പുറത്തുവന്നത്.
