തിരുവനന്തപുരം: യുഡിഎഫില് മുഖ്യമന്ത്രിയെ തീരുമാനിക്കും മുന്നേ ഭരണത്തില് പിടിമുറുക്കി മുസ്ലിം ലീഗ്. മുഖ്യമന്ത്രി ആരാകണമെന്ന നിര്ദേശം നല്കി ലീഗ് നേതാക്കള്. ലീഗിന്റെ കൈകടത്തലിനെതിരെ സംസാരിച്ച കോണ്ഗ്രസ് എംഎല്എ മാത്യു കുഴല്നാടനെതിരെ നടത്തിയ പ്രതിഷേധം ഭരണത്തില് പിടിമുറുക്കുന്നതിനുള്ള മുന്നറിയിപ്പെന്നും സൂചന.
ഉപമുഖ്യമന്ത്രി സ്ഥാനത്തിന് പുറമെ ഡെപ്യൂട്ടി സ്പീക്കര്, കേന്ദ്ര സര്ക്കാരില് നിന്നും കൂടുതല് ഫണ്ട് ലഭിക്കുന്ന വിദ്യാഭ്യാസം, പൊതുമരാമത്ത്, ആരോഗ്യം, തദ്ദേശം, വ്യവസായം ഉള്പ്പെടെ വകുപ്പുകള് ലീഗ് ആവശ്യപ്പെട്ടിട്ടുണ്ട്. വിദ്യാഭ്യാസം ലീഗില് നിന്നും മാറ്റണമെന്ന ആവശ്യം കോണ്ഗ്രസില് തുടക്കത്തില് ഉയര്ന്നെങ്കിലും പിന്നീട് അതില്ലാതായി. ലീഗിന്റെ 22 എംഎല്എമാരെ കൂടാതെ മുസ്ലീം വിഭാഗത്തിലുള്ള എട്ട് എംഎല്മാരുടെ കൂടി കണക്ക് പറഞ്ഞാണ് ലീഗ് ഭരണത്തില് ഇടപെട്ട് തുടങ്ങിയത്. ഇതിനുപിന്നാലെയാണ് ലീഗ് നേതാവിന്റെ പിഎയുടെ നിര്ദേശപ്രകാരം കുടുംബശ്രീ ജില്ലാ മിഷനിലെ 2624 താത്കാലിക ജീവനക്കാരെ പിരിച്ചുവിടാന് നിര്ദ്ദേശിച്ചിരിക്കുന്നത്. ഉമ്മന്ചാണ്ടി സര്ക്കാരിന്റെ കാലം മുതല് നിയമിക്കപ്പെട്ടവരുള്പ്പടെയുള്ളവര് ഇതിലുണ്ട്. പകരം ലീഗുകാരെ തിരുകിക്കയറ്റാനുള്ള നീക്കവും ആരംഭിച്ചിട്ടുണ്ട്. ഇതടക്കം ഭരണപരമായ വകുപ്പുകളിലെല്ലാം ലീഗ് ഇടപെട്ട് തുടങ്ങി. ആഭ്യന്തരവകുപ്പിലെ സ്ഥലം മാറ്റമുള്പ്പെടെയുള്ള കാര്യങ്ങളില് ലീഗ് പട്ടിക തയാറാക്കിയിട്ടുണ്ടെന്നാണ് വിവരം.
തെരഞ്ഞെടുപ്പ് ഫലം വന്നതിന്റെ പിറ്റേന്ന് രാവിലെ തന്നെ മുസ്ലിം ലീഗ് സംസ്ഥാന അധ്യക്ഷന് സാദിഖലി തങ്ങള് വി.ഡി. സതീശനുവേണ്ടി രംഗത്തെത്തിയിരുന്നു. തുടര്ന്ന് കെ.എം. ഷാജിയും സതീശന് അനുകൂലമായി പ്രസ്താവന നടത്തി. കോണ്ഗ്രസില് ലീഗ് പിടിമുറുക്കുന്നുവെന്ന് ആരോപണം ഉയര്ന്നതോടെ അഭിപ്രായം മയപ്പെടുത്തി. ഭരണത്തില് പിടിമുറുക്കാനുള്ള ലീഗിന്റെ നീക്കം പുറത്തറിഞ്ഞതോടെ ലീഗിനെതിരെ ഭീതി പരത്തുന്നുവെന്ന ന്യായീകരണം നിരത്തി എം.കെ. മുനീറിനെ രംഗത്തിറക്കി സംരക്ഷണം ഒരുക്കി. അതേസമയം എഐസിസി നിരീക്ഷകരോട് വി.ഡി. സതീശനെ അനുകൂലിക്കുന്ന നിലപാടാണ് മുസ്ലിം ലീഗ് സ്വീകരിച്ചത്.
കോണ്ഗ്രസ് നേതൃത്വത്തിന്റെ തീരുമാനം വന്നശേഷം മുഖ്യമന്ത്രി ആരാകണമെന്ന ലീഗിന്റെ തീരുമാനം ചര്ച്ചചെയ്ത് അറിയിക്കാമെന്നാണ് എഐസിസി കൂടിക്കാഴ്ചയ്ക്ക് ശേഷം പി.കെ. കുഞ്ഞാലിക്കുട്ടി മാധ്യമങ്ങളോട് പറഞ്ഞത്. വി.ഡി. സതീശനായി ഒരു വിഭാഗം തെരുവിലിറങ്ങുന്നത് ലീഗ് പിന്തുണയോടെയാണെന്ന് കോണ്ഗ്രസിനുള്ളില് നിന്നുതന്നെ ആരോപണമുണ്ട്.
ജന്മഭൂമി ഓണ്ലൈന്