ന്യൂദല്‍ഹി: ഇന്ത്യന്‍ പ്രീമിയര്‍ ലീഗ്(ഐപിഎല്‍) ക്രിക്കറ്റ് മറ്റൊരു മാറ്റത്തിന് തയ്യാറെടുക്കുവാന്‍ ആലോചനകള്‍. 94 മത്സരങ്ങളുള്ള ക്രിക്കറ്റ് കാര്‍ണിവലായി ലീഗിനെ വിപുലപ്പെടുത്താനാണ് ആലോചിക്കുന്നത്. 2028 ഐപിഎല്‍ സീസണിലായിരിക്കും ഇത് നടപ്പാക്കുക.
പ്രധാനമായും ഓരോ ടീമും രണ്ട് തവണ വീതം നേര്‍ക്കുനേര്‍ വരുന്ന തരത്തില്‍ റൗണ്ട് റോബിന്‍ സംവിധാനത്തിലാക്കുന്നതിനെ കുറിച്ചാണ് ആലോചിക്കുന്നത്. ഇത്തരത്തിലൊരു ലക്ഷ്യം കോവിഡ് കാലത്തിന് ശേഷം നടപ്പില്‍ വരുത്തുമെന്ന് ഏകദേശ ധാരണ ഉണ്ടായിരുന്നു. ഇപ്പോള്‍ അതേ കുറിച്ച് ഗൗരവമായി ആലോചിക്കുകയാണെന്നാണ് അധികൃതരില്‍ നിന്നും വരുന്ന സൂചനകള്‍. ഐപിഎല്‍ ചെയര്‍മാന്‍ അരുണ്‍ ധുമാള്‍ ആണ് ഇക്കാര്യങ്ങള്‍ സംബന്ധിച്ച് ആശയവിനിമയം നടത്തിയത്. മത്സരങ്ങള്‍ കൂടിയാലും ഫ്രാഞ്ചൈസികളുടെ എണ്ണത്തില്‍ വ്യത്യാസമുണ്ടാകില്ലെന്ന് അരുണ്‍ ധുമാള്‍ അറിയിച്ചു. നിലവില്‍ ഫൈനല്‍ ഉള്‍പ്പെടെ 74 മത്സരങ്ങളാണ് ഐപിഎല്ലില്‍ ഉള്ളത്.
