കണ്ണൂർ : തളിപ്പറമ്പിൽ സി.പി.എമ്മിന് കനത്ത തിരിച്ചടി നൽകിയ ടി.കെ. ഗോവിന്ദനെ സ്വന്തം വീട്ടിൽ സ്വീകരിച്ച് ആനയിച്ച ബിനീഷ് കോടിയേരിയ്ക്കെതിരെ സഖാക്കളുടെ രൂക്ഷ വിമർശനം. എം.വി. ഗോവിന്ദന്റെ ഭാര്യ പി.കെ. ശ്യാമളയെ തോൽപിച്ചാണ് തളിപ്പറമ്പിൽ ടി.കെ. ഗോവിന്ദൻ വിജയിച്ചത്.
ഇന്നലെയാണ് ടി.കെ. ഗോവിന്ദനും ഭാര്യയും കോടിയേരിയുടെ വീട്ടിലെത്തിയത്. ഇത് ആയിരക്കണക്കിന് സഖാക്കളെ പരിഹസിക്കുന്നതിന് തുല്യമാണെന്നാണ് സൈബർ ഇടങ്ങളിൽ ഉയരുന്ന വിമർശനം. ടികെ ഗോവിന്ദൻ കോടിയേരിയ്ക്ക് നൽകിയ പുഷ്പാർച്ചന വെറും നാടകമാണെന്നും അതിനു കൂട്ടു നിന്ന നീയാണ് മികച്ച നടൻ എന്നും സഖാക്കൾ ബിനീഷിനെ കുറ്റപ്പെടുത്തുന്നുണ്ട്.
വർഗ വഞ്ചകന് ഈ വീട്ടിൽ പ്രവേശനം ഇല്ല എന്ന് പറയണം ആയിരുന്നു , കോടിയേരിയാണെങ്കിൽ ആ ഗേറ്റ് പോലും തുറക്കില്ലായിരുന്നു, തോൽവിയുടെ കണ്ണീർ വറ്റിയിട്ടില്ലാത്ത സഖാക്കളുടെ നെഞ്ചിൽ ചവിട്ടിയാണ് ഈ ‘നാടകം’ അരങ്ങേറിയതെന്നും അണികൾ കുറ്റപ്പെടുത്തുന്നു. മുസ്ലിം ലീഗിന്റെ വോട്ട് വാങ്ങി ജയിച്ച ഒരാളെ, കമ്മ്യൂണിസ്റ്റുകാർ ഈ ജന്മം നേരെയാകില്ലെന്ന് പ്രസ്താവന നടത്തിയതിന് തൊട്ടുപിന്നാലെ കോടിയേരിയുടെ വീട്ടിൽ മടിയിൽ കയറ്റി ഇരുത്തിയത് എന്ത് ആശയത്തിന്റെ അടിസ്ഥാനത്തിലാണെന്നും അണികൾ ചോദിക്കുന്നു.
