കോഴിക്കോട്: ഭാരതീയ മസ്ദൂര് സംഘിന്റെ കോഴിക്കോട് ജില്ലാ കമ്മിറ്റി ഓഫീസിന്റെയും ദത്തോപന്ത് ഠേംഗ്ഡിജി തൊഴിലാളി പഠന പരിശീലന ഗവേഷണ കേന്ദ്രത്തിന്റെയും ഉദ്ഘാടനം നാളെ ആര്എസ്എസ് മുന് സര്കാര്യവാഹ് സുരേഷ് ജോഷി നിര്വഹിക്കും. കോഴിക്കോട് കമ്മത്ത് ലൈനില് പൂര്ത്തീകരിച്ച കെട്ടിടത്തിന്റെ ഗൃഹപ്രവേശം നാളെ രാവിലെ ഒമ്പതിന് നടക്കും. രാവിലെ 11ന് പൊതുസമ്മേളനത്തില് ബിഎംഎസ് ദേശീയ പ്രസിഡന്റ് എസ്. മല്ലേശ്വരം മുഖ്യപ്രഭാഷണം നടത്തും.
ആര്എസ്എസിന്റെയും ബിഎംഎസിന്റെയും പ്രവര്ത്തനം കേരളത്തില് ആദ്യമായി ആരംഭിച്ചത് കോഴിക്കോട്ടാണ്. തൊഴില് മേഖലയിലെ നൈപുണ്യം വര്ദ്ധിപ്പിക്കാനും തൊഴിലാളികള്ക്ക് പരിശീലനം നല്കാനും വേണ്ടിയാണ് ബിഎംഎസ് സ്ഥാപകനായ ഠേംഗ്ഡിജിയുടെ പേരില് പഠന ഗവേഷണ കേന്ദ്രം പ്രവര്ത്തനമാരംഭിക്കുന്നതെന്നും അറിവിലൂടെയും നൈപുണ്യ വികസനത്തിലൂടെയും തൊഴിലാളി സമൂഹത്തെ കൂടുതല് കരുത്തുറ്റവരാക്കാന് ഈ സംരംഭത്തിന് സാധിക്കുമെന്നും ഭാരവാഹികള് അറിയിച്ചു.
വാര്ത്താസമ്മേളനത്തില് ബിഎംഎസ് സംസ്ഥാന വൈസ് പ്രസിഡന്റ് അഡ്വ. പി. മുരളീധരന്, ജില്ലാ പ്രസിഡന്റ് സി.പി. രാജേഷ്, ജില്ല സെക്രട്ടറി ടി.എം. പ്രശാന്ത്, ബിഎംഎസ് സംസ്ഥാന സമിതി അംഗം ഈശ്വരന് നമ്പൂതിരി എന്നിവര് പങ്കെടുത്തു.
