ആലപ്പുഴ: നിയമസഭാ തെരഞ്ഞെടുപ്പിലെ ദയനീയ പരാജയത്തെ തുടര്ന്ന് ജില്ലയിലെ സിപിഎമ്മില് പൊട്ടിത്തെറി തുടങ്ങി. പാര്ട്ടിയുടെ വീഴ്ചകള് ചൂണ്ടിക്കാട്ടി മാധ്യമങ്ങളോട് പ്രതികരിച്ച കായംകുളത്തെ സ്ഥാനാര്ത്ഥി യു. പ്രതിഭയെ പരസ്യമായി തള്ളിപ്പറഞ്ഞ് സിപിഎം ജില്ലാ സെക്രട്ടറി ആര്. നാസറും രംഗത്തെത്തി. മുതിര്ന്ന നേതാവ് ജി. സുധാകരന് പാര്ട്ടി വിട്ട് യുഡിഎഫ് പിന്തുണയില് വലിയ ഭൂരിപക്ഷത്തിന് വിജയിച്ചതോടെ കനത്ത ആഘാതത്തിലായ സിപിഎമ്മിനെ കൂടുതല് പ്രതിസന്ധിയിലാക്കുന്നതാണ് പ്രതിഭയുടെ നിലപാട്.
പാര്ട്ടി വോട്ടുകളില് കുറവുണ്ടായെന്നും, വെള്ളാപ്പള്ളി നടേശന് തനിക്കെതിരെ പ്രവര്ത്തിച്ചെന്നും എസ്എന്ഡിപി വോട്ടുകളില് ചോര്ച്ച ഉണ്ടായെന്നും പ്രതിഭ മാധ്യമങ്ങളോട് പ്രതികരിച്ചു. സിപിഎം ശക്തികേന്ദ്രങ്ങളായ പത്തിയൂരും ചെട്ടികുളങ്ങരയിലും വോട്ട് കുറഞ്ഞത് അമ്പരപ്പ് ഉണ്ടാക്കിയെന്നും പ്രതിഭ പറയുന്നു. കഴിഞ്ഞ തവണത്തേത് പോലെ പാര്ട്ടിയുടെ തെരഞ്ഞെടുപ്പ് പ്രവര്ത്തനം ഊര്ജസ്വലമായിരുന്നില്ലെന്നും പ്രതിഭ വിമര്ശിച്ചു. സ്ഥിരമായി ഒന്നാമത് എത്തിയിരുന്ന ബൂത്തില് പോലും മുന്നേറാനായില്ല. തനിക്കെതിരെ വെള്ളാപ്പള്ളി പ്രവര്ത്തിച്ചു. ഇത് എസ്എന്ഡിപി വോട്ടുകളില് ചോര്ച്ച ഉണ്ടാക്കി. യഥാര്ത്ഥ ശ്രീനാരായണീയയായ തനിക്കെതിരെ പ്രവര്ത്തിച്ചു. കേരളത്തില് മൊത്തം ഇത്തരത്തില് പ്രതിപ്രവര്ത്തനം നടന്നിട്ടുണ്ടെന്നും പറഞ്ഞു. എന്നാല് പ്രതിഭയ്ക്കെതിരെ അതിരൂക്ഷമായ വിമര്ശനമാണ് ജില്ലാ സെക്രട്ടറി ആര്. നാസര് നടത്തിയത്. പ്രതിഭ തോറ്റ് കഴിഞ്ഞ് അസംബന്ധം പറയുകയാണ്. സഖാക്കള് കായംകുളത്ത് നല്ല രീതിയില് പണിയെടുത്തു. തോറ്റ് കഴിയുമ്പോള് എന്തും പറയാമെന്നാണോ, ലോക്സഭയില് മൂന്നാം സ്ഥാനത്ത് പോയപ്പോഴും ഇവര് തന്നെയല്ലേ എംഎല്എ എന്നും അതിന്റെ ഉത്തരവാദിത്തം ഇവര്ക്കല്ലേ എന്നും നാസര് ചോദിച്ചു. അപ്പോള് എന്താണ് സംഭവിച്ചത്. അത് പരിശോധിക്കണം.
നേരത്തെ എല്ഡിഎഫിന് വോട്ട് ചെയ്ത എസ്എന്ഡിപിക്കാര് എന്തുകൊണ്ട് ഇത്തവണ ചെയ്തില്ല. അവരോടുള്ള എതിര്പ്പാണോ കാരണം, അല്ലെങ്കില് മറ്റെന്തെങ്കിലും ആണോയെന്ന് പരിശോധിക്കണം. വെള്ളാപ്പള്ളി എന്ത് ചെയ്തെന്നാണ് യു. പ്രതിഭ ഉദ്ദേശിക്കുന്നതെന്നും അദ്ദേഹം ചോദിച്ചു. എസ്എന്ഡിപി വോട്ടുകള് നേടിയാണ് രണ്ട് തവണ അവര് ജയിച്ചത്. ഈ തവണ എസ്എന്ഡിപി വോട്ടുകള് നഷ്ടമായത് എന്തുകൊണ്ടെന്ന് പ്രതിഭ തന്നെ ആലോചിക്കണം. പാര്ട്ടി സഖാക്കള് നല്ല പണിയെടുത്തിട്ടുണ്ട്. തോറ്റ ശേഷം പാര്ട്ടിയെ കുറ്റം പറയുന്നത് ജി. സുധാകരന്റെ രീതിയെന്നും നാസര് വിമര്ശിച്ചു.
എല്ഡിഎഫ് സ്ഥാനാര്ത്ഥിയായ യു. പ്രതിഭ ഇത്തവണ യുഡിഎഫ് സ്ഥാനാര്ത്ഥി എം. ലിജുവിനോട് വലിയ മാര്ജിനിലാണ് പരാജയപ്പെട്ടത്. 15,572 വോട്ടുകളുടെ ഭൂരിപക്ഷമാണ് ലിജുവിന് ലഭിച്ചത്. 76,651 വോട്ടുകള് ലിജു നേടി. യു. പ്രതിഭയ്ക്ക് 61,079 വോട്ടുകളും ബിഡിജെഎസ് സ്ഥാനാര്ത്ഥി തമ്പി മേട്ടുതറയ്ക്ക് 16,973 വോട്ടുകളുമാണ് ലഭിച്ചത്. 2021ല് 6298 വോട്ടുകളുടെ ഭൂരിപക്ഷത്തിനാണ് പ്രതിഭ വിജയിച്ചത്. പ്രതിഭയ്ക്ക് 77,348 വോട്ടുകളും യുഡിഎഫിന്റെ അരിത ബാബുവിന് 71,050 വോട്ടുകളുമാണ് ലഭിച്ചത്. പാര്ട്ടി മാനദണ്ഡങ്ങള് പോലും ലംഘിച്ചാണ് കായംകുളത്ത് തുടര്ച്ചയായി മൂന്നാം തവണയും മത്സരിക്കാന് സംസ്ഥാന നേതൃത്വം പ്രതിഭയ്ക്ക് അവസരം നല്കിയത്. പ്രതിഭയെ ഒഴിവാക്കി സിപിഎം ജില്ലാ സെക്രട്ടറി ആര്. നാസറിനെ കായംകുളത്ത് സ്ഥാനാര്ത്ഥിയാക്കണെമെന്നായിരുന്നു ജില്ലാ നേതൃത്വത്തിന്റെ ശിപാര്ശ. ഇത് തള്ളിയാണ് പ്രതിഭയെ വീണ്ടും മത്സരിപ്പിച്ചത്. ആലപ്പുഴ ജില്ലയില് ആകെയുള്ള ഒന്പത് മണ്ഡലങ്ങളില് ആറിടത്തും യുഡിഎഫാണ് വിജയിച്ചത്. 2021ല് ഒരു സീറ്റ് മാത്രമാണ് യുഡിഎഫിനുണ്ടായിരുന്നത്.
