ആലപ്പുഴ: യുഡിഎഫിനെ എതിര്ക്കുന്നു എന്ന് പറയുന്ന സിപിഎം കാസര്കോഡ് രണ്ട് മണ്ഡലങ്ങളില് മൂസ്ലിംലീഗിനെ സഹായിച്ചെന്ന് മുന് മന്ത്രിയും, അമ്പലപ്പുഴയിലെ നിയുക്ത എംഎല്എയുമായ ജി. സുധാകരന്. കാസര്കോഡ് രണ്ട് മണ്ഡലങ്ങളില് ബിജെപി പരാജയപ്പെട്ടത് ലീഗിനെ സിപിഎം പിന്തുണച്ചതിനാലാണ്. പറയുന്നതിന് വിരുദ്ധമായാണ് സിപിഎം പ്രവര്ത്തിക്കുന്നത്. ആശയവൈരുദ്ധ്യങ്ങളുടെ കലവറയാണ് ഇന്ന് സിപിഎം എന്നും സുധാകരന് സ്വകാര്യചാനലിന് നല്കിയ അഭിമുഖത്തില് പറഞ്ഞു.
രാഷ്ട്രീയമില്ലാതെ വല്ലവരെയും ആക്ഷേപിക്കാന് നടക്കുന്നവര്ക്ക് ജനങ്ങള് വോട്ടുചെയ്യുമോ? ഇങ്ങനെ പറയാന് പാടില്ല എന്ന് സിപിഎമ്മിന് പറഞ്ഞുകൊടുക്കാന് ഇന്നാരെങ്കിലും കേരളത്തിലുണ്ടോ. ഞാന് സിപിഎമ്മില് പ്രവര്ത്തിച്ചപ്പോള് പാര്ട്ടി ഇങ്ങനെയൊന്നുമായിരുന്നില്ല. നാലഞ്ച് വര്ഷം മുമ്പുവരെയും ഇങ്ങനെയായിരുന്നില്ല. സിപിഎം ഇപ്പോള് സിപിഎം അല്ലാതായി. അതുകൊണ്ടാണ് പാര്ട്ടിവിട്ടത്. കൊടിയും ചിഹ്നവും പ്രസംഗവും മാത്രമേ ഉള്ളൂ. എനിക്കിനി സിപിഎമ്മിലേക്ക് തിരിച്ചുപോകേണ്ട ആവശ്യമില്ല. നേതൃത്വം ഈ പാര്ട്ടിയെ ആറടിമണ്ണില് താഴ്ത്തും.
പിണറായി വിജയന് സിപിഎമ്മിനെ നയിച്ചത് പാര്ട്ടിയുടെ വഴിയിലൂടെയല്ല. തനിക്കെതിരെ പിണറായി വിജയന് നടത്തിയ ചെറ്റ പ്രയോഗം പ്രത്യയശാസ്ത്ര ദാരിദ്ര്യമാണ്. എല്ലാ ഘടകങ്ങളും അനുകൂലമായിരുന്നു. സമുദായ, രാഷ്ട്രീയ വ്യത്യാസമില്ലാതെ ജനങ്ങള് എനിക്കൊപ്പമാണെന്ന് മനസിലാക്കിയാണ് ജനകീയ സ്വതന്ത്രനായി ഞാന് സ്ഥാനാര്ത്ഥിത്വം പ്രഖ്യാപിച്ചത്. ആരോടും ഞാന് ആലോചിച്ചില്ല. ആശയപരമായി നേതൃത്വം നല്കാന് ഇന്ന് സിപിഎമ്മില് ആരുമില്ല. ഇഎംഎസിന്റെ കാലത്തൊക്കെ എതിരാളികളോട് പ്രത്യയശാസ്ത്രപരമായ ഏറ്റുമുട്ടലുകള് നടത്തുമായിരുന്നു. പ്രത്യയശാസ്ത്ര ദാരിദ്ര്യമാണ് ഇന്ന് സിപിഎം നേരിടുന്നത്. പിണറായി വിജയന് പ്രതിപക്ഷ നേതാവ് ആകുമോയെന്നത് അവരുടെ കാര്യമാണെന്നും സുധാകരന് പ്രതികരിച്ചു.
