ഭരണക്കപ്പല്‍ മുങ്ങിത്താണപ്പോള്‍ കൂട്ടത്തോടെ തോറ്റ് തുന്നംപാടി ഇടത് മന്ത്രിമാര്‍

തിരുവനന്തപുരം: രണ്ടാം പിണറായി സര്‍ക്കാരിന്റെ ഭരണക്കപ്പല്‍ മുങ്ങിത്താണപ്പോള്‍ കൂട്ടത്തോടെ തോറ്റ് തുന്നംപാടി മന്ത്രിമാരും. കപ്പിത്താനായ പിണറായി വിജയനു പോലും മുട്ടിടിച്ചതോടെ മന്ത്രിസഭയിലെ 14 മന്ത്രിമാര്‍ ദയനീയമായി പരാജയപ്പെട്ടു.

ധര്‍മ്മടത്ത് ഏഴാം റൗണ്ടുവരെ പിന്നിലായിരുന്ന പിണറായി വിജയന്‍ മരണത്തോട് മല്ലടിച്ചാണ് അവസാന റൗണ്ടുകളില്‍ ജീവന്‍ തിരിച്ചുപിടിച്ചത്. മുഖ്യമന്ത്രിയുടെ 2016 ലെ 50,123 എന്ന കൂറ്റന്‍ ഭൂരിപക്ഷം 19,247 ലൊതുങ്ങി. അപ്പോഴേക്കും മന്ത്രിസഭയിലെ വമ്പന്മാരൊക്കെ മുങ്ങിത്താണു.

ബിജെപിയെ പൂട്ടാന്‍ ഇരട്ടപ്പൂട്ടുമായി ഇറങ്ങിയ വിദ്യാഭ്യാസ മന്ത്രി വി. ശിവന്‍കുട്ടി ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിനോട് 4978 വോട്ടുകള്‍ക്ക് ദയനീയമായി പരാജയപ്പെട്ടു. എസ്ഡിപിഐയുടെ പിന്തുണ പരസ്യമായി ലഭിച്ചിട്ടും ശിവന്‍കുട്ടിക്ക് ഒരിക്കല്‍പോലും ലീഡുയര്‍ത്താനായില്ല. ബിജെപിയുടെ കുമ്മനം രാജശേഖരനെ 3949 വോട്ടിന് പരാജയപ്പെടുത്തിയപ്പോള്‍ ബിജെപിയുടെ അക്കൗണ്ട് പൂട്ടിച്ചെന്നായിരുന്നു ശിവന്‍കുട്ടിയുടെ അവകാശവാദം. രണ്ടാം പിണറായി സര്‍ക്കാരിനെ കപ്പലായും മുഖ്യമന്ത്രിയെ കപ്പിത്താനായും വിശേഷിപ്പിച്ച ആരോഗ്യമന്ത്രി വീണാജോര്‍ജിന് 18,985 വോട്ടുകള്‍ക്ക് ആറന്മുളയില്‍ ശ്വാസം നിലച്ചു. ശബരിമല സ്വര്‍ണക്കൊള്ളയ്‌ക്ക് ഉള്‍പ്പെടെ ഒത്താശ ചെയ്ത ദേവസ്വം മന്ത്രി വി.എന്‍. വാസവന്‍ ഏറ്റുമാനൂരില്‍ 19,752 വോട്ടിന് പൊട്ടിയപ്പോള്‍ കളമശ്ശേരിയില്‍ മത്സരിച്ച വ്യവസായ മന്ത്രി പി. രാജീവ് 16,312 വോട്ടിന് പരാജയം ഏറ്റുവാങ്ങി.

തദ്ദേശ മന്ത്രി എം.ബി. രാജേഷിനെ 8385 വോട്ടിന് തൃത്താലക്കാര്‍ പുറന്തള്ളിയപ്പോള്‍ ഉന്നതവിദ്യാഭ്യാസ മന്ത്രി ആര്‍. ബിന്ദുവിനെ 10,212 വോട്ടിന് ഇരിങ്ങാലക്കുടക്കാരും വലിച്ചെറിഞ്ഞു. ലോക്‌സഭാ തെരഞ്ഞെടുപ്പിന് പിന്നാലെ മന്ത്രിയായ പട്ടികജാതി പട്ടികവര്‍ഗ മന്ത്രി ഒ.ആര്‍. കേളുവിനെ 10,543 വോട്ടുകള്‍ക്കാണ് മാനന്തവാടിക്കാര്‍ പുറത്താക്കിയത്. കായികമന്ത്രി വി. അബ്ദുറഹിമാന് 24,137 വോട്ടിന് തിരൂരും നഷ്ടമായി. സിപിഐയുടെ മൃഗസംരക്ഷണ മന്ത്രി ജെ. ചിഞ്ചുറാണി ചടയമംഗലത്ത് 7486 വോട്ടിനാണ് പരാജയപ്പെട്ടത്. 2011 മുതല്‍ പത്തനാപുരം കുത്തകയാക്കിയ ഗതാഗത മന്ത്രി ഗണേഷ്‌കുമാറിനെ 8310 വോട്ടിന് ഇത്തവണ മണ്ഡലം കൈവിട്ടു. ഇടുക്കിയില്‍ ജലവിഭവവ മന്ത്രി റോഷി അഗസ്റ്റിന്‍ മുങ്ങിത്താണത് 23,822 വോട്ടിനാണ്.

വനം മന്ത്രി എ.കെ. ശശീന്ദ്രന്‍ എലത്തൂരില്‍ 12,162 വോട്ടിനും തുറമുഖ മന്ത്രി കടന്നപ്പള്ളി രാമചന്ദ്രന്‍ കണ്ണൂരില്‍ 18,551 വോട്ടിനും നിയമസഭയില്‍ നിന്ന് പുറത്തായി. കടന്നപ്പള്ളിക്ക് തൊട്ടുമുമ്പ് തുറമുഖ മന്ത്രിയായിരുന്ന അഹമ്മദ് ദേവര്‍കോവിലും കോഴിക്കോട് സൗത്തില്‍ 10,795 വോട്ടിന് പരാജയമേറ്റുവാങ്ങി. ജയിച്ച മന്ത്രിമാര്‍ക്കാകട്ടെ കാര്യമായ ഭൂരിപക്ഷം ലഭിച്ചതുമില്ല.

ധനമന്ത്രി കെ.എന്‍. ബാലഗോപാലിന്റെ ഭൂരിപക്ഷം കൊട്ടാരക്കരയില്‍ 1012 മാത്രമാണ്. ബേപ്പൂരില്‍ പൊതുമരാമത്ത് മന്ത്രി മുഹമ്മദ് റിയാസിന്റെ ഭൂരിപക്ഷം 7487 ല്‍ ഒതുങ്ങി. ചെങ്ങന്നൂരില്‍ സാംസ്‌കാരിക മന്ത്രി സജിചെറിയാന് മാത്രമാണ് സിപിഎം മന്ത്രിമാരില്‍ ഭൂരിപക്ഷം അഞ്ചക്കത്തില്‍ എത്തിയത്. 10292 വോട്ട്. സിപിഐയില്‍ നെടുമങ്ങാട് മത്സരിച്ച ഭക്ഷ്യമന്ത്രി ജി.ആര്‍. അനില്‍ 21,583 ഉം ചേര്‍ത്തലയില്‍ കൃഷി മന്ത്രി പി. പ്രസാദ് 14,489 ഉം വോട്ടുകളുടെ ഭൂരിപക്ഷം നേടിയതാണ് ഏക ആശ്വാസം.