ലഖ്നൗ: റീല്സ് ചിത്രീകരണത്തിനിടെ വാട്ടര് ടാങ്കിന് മുകളില് കുടുങ്ങിയ കുട്ടികളെ വ്യോമസേന താഴെയിറക്കി. ഉത്തര്പ്രദേശ് സിദ്ധാര്ത്ഥ് നഗറിലാണ് സംഭവം.
ശനിയാഴ്ച വൈകിട്ടോടെ പ്രദേശവാസികളായ സിദ്ധാര്ത്ഥ്, ഗോലു, സണ്ണി, പവന്, കല്ലു എന്നിവര് റീല്സ് ചിത്രീകരണത്തിനായി 50 അടി ഉയരമുള്ള വാട്ടര് ടാങ്കിന് മുകളിലേക്ക് കയറുകയായിരുന്നു. ഇവര് കയറിയതിന് പിന്നാലെ ഗോവണി തകര്ന്ന് സിദ്ധാര്ത്ഥ്, ഷാനി, ഗോലു എന്നീ മൂന്ന് കുട്ടികള് താഴെ വീണു. പവന്, കല്ലു എന്നീ രണ്ട് കുട്ടികള് ടാങ്കിന് മുകളിലും കുടുങ്ങി.
ടാങ്കില് നിന്ന് വീണ് ഗുരുതരമായി പരിക്കേറ്റ സിദ്ധാര്ത്ഥ് സംഭവ സ്ഥലത്തുവെച്ചുതന്നെ മരിച്ചു. ഇരുവര്ക്കും പരിക്കുണ്ടെങ്കിലും അപകടനില തരണം ചെയ്തതായി അധികൃതര് അറിയിച്ചു.
ഗോവണി തകര്ന്നതിനാല് വാട്ടര് ടാങ്കിന് മുകളില് കുടുങ്ങിയ കുട്ടികള്ക്ക് താഴേക്ക് ഇറങ്ങാനായിരുന്നില്ല. തുടര്ന്ന് ഗോരഖ്പൂരില് നിന്ന് രാത്രിയില് ദേശീയ ദുരന്തനിവാരണ സേന (എന്ഡിആര്എഫ്) എത്തി രക്ഷാപ്രവര്ത്തനം ആരംഭിച്ചെങ്കിലും ടാങ്കിലേക്കുള്ള റോഡിന് സൗകര്യം ഇല്ലാത്തതിനാല് ഇവരെ ലിഫ്റ്റ് ചെയ്യാനുള്ള നീക്കം വിജയിച്ചില്ല. തുടര്ന്ന് ജില്ലാ ഭരണകൂടത്തിന്റെ സഹായത്തോടെ ടാങ്കിലേക്കെത്താനുള്ള ബദല്മാര്ഗം സൃഷ്ടിക്കാന് ശ്രമിച്ചെങ്കിലും ശക്തമായ മഴമൂലം ഇത് പൂര്ത്തിയാക്കാനായില്ല. ഇതോടെയാണ് വ്യോമസേനയുടെ സഹായം അഭ്യര്ത്ഥിക്കുന്നത്. ഇന്നലെ പുലര്ച്ചെ 5.20 ഓടെ എത്തിയ ഹെലിക്കോപ്ടര് ടാങ്കിന് സമീപം ലാന്ഡ് ചെയ്തു, ഉടന് തന്നെ രക്ഷാപ്രവര്ത്തനം ആരംഭിച്ചു, 15 മിനിറ്റിനുള്ളില് രണ്ട് കുട്ടികളേയും സുരക്ഷിതമായി രക്ഷപ്പെടുത്തി. ശേഷം രണ്ട് കുട്ടികളെയും അതേ ഹെലികോപ്ടറില് ഗോരഖ്പൂരിലേക്ക് കൊണ്ടുപോയി വൈദ്യപരിശോധനയ്ക്ക് വിധേയമാക്കി.
