കൊച്ചി: ഭൂതത്താന്കെട്ട് ജലവൈദ്യുത പദ്ധതിയുടെ ചെലവ് സംബന്ധിച്ച് കെഎസ്ഇബിയിലെ രണ്ട് ഉന്നത ഓഫീസുകള് നല്കിയ വിവരാവകാശ മറുപടികളില് 101 കോടിയുടെ പൊരുത്തക്കേട്. കൊച്ചി സ്വദേശിയായ വിവരാവകാശ പ്രവര്ത്തകന് കെ. ഗോവിന്ദന് നമ്പൂതിരി എറണാകുളം പ്രസ്ക്ലബ്ബില് ഇന്നലെ നടത്തിയ വാര്ത്താസമ്മേളനത്തിലാണ് രേഖകളിലെ വൈരുധ്യം സംബന്ധിച്ച വിവരങ്ങള് പുറത്തുവിട്ടത്.
ചീഫ് എന്ജിനീയര് (പ്രോജക്ട്സ്) ഓഫീസിലെ സ്റ്റേറ്റ് പബ്ലിക് ഇന്ഫര്മേഷന് ഓഫീസര് 2025 ആഗസ്ത് 30ന് നല്കിയ മറുപടി പ്രകാരം പദ്ധതിയുടെ എസ്റ്റിമേറ്റ് തുക 231.21 കോടിയാണ്. 2025 ജൂലൈ വരെയുള്ള ചെലവ് 191.40 കോടിയും. എന്നാല് ഡയറക്ടര് (ജനറേഷന് ആന്ഡ് ഇലക്ട്രിക്കല്) 2025 ഫെബ്രുവരി 18ന് നല്കിയ മറുപടിയില് പദ്ധതിയുടെ ചെലവ് 293 കോടിയെന്നാണ് രേഖപ്പെടുത്തിയിരിക്കുന്നത്. രണ്ട് മറുപടികള് തമ്മില് 101 കോടിയുടെ വ്യത്യാസം.
2021 നവംബര് മുതല് ഭൂതത്താന്കെട്ട് പദ്ധതി നിലച്ച നിലയിലാണ്. പദ്ധതിയുടെ പുരോഗതി 93.37 ശതമാനമാണെന്ന് രേഖകള് വ്യക്തമാക്കുന്നു. കരാറുകാരന്റെ 30.65 കോടിയുടെ ബാങ്ക് ഗ്യാരണ്ടി കണ്ടുകെട്ടേണ്ടതുണ്ടെന്നും മറുപടിയില് പറയുന്നു. പദ്ധതി നിലച്ചതിനെ തുടര്ന്നുള്ള മൊത്തം നഷ്ടം ഇതുവരെ കണക്കാക്കിയിട്ടില്ലെന്നും രേഖ വ്യക്തമാക്കുന്നു.
കൂടാതെ സംസ്ഥാനം രൂക്ഷമായ വൈദ്യുതി ക്ഷാമം നേരിടുന്ന സാഹചര്യത്തില്, ഗ്രിഡ് ബന്ധിത സോളാര് പദ്ധതികള് നടപ്പാക്കുന്നതിലുള്ള കെഎസ്ഇബിയുടെ കെടുകാര്യസ്ഥതയും വ്യക്തമാണ്. ഏറ്റുമാനൂരില് 2.48 കോടി ചെലവഴിച്ചിട്ടും പദ്ധതി എങ്ങുമെത്തിയില്ല. മൈലാട്ടിയില് 1.58 കോടി നഷ്ടമുണ്ടായി. 6.68 കോടി ചെലവ് പ്രതീക്ഷിച്ച ഏറ്റുമാനൂരിലെ ഒരു മെഗാവാട്ട് സോളാര് പദ്ധതിക്കായി കരാറുകാര് വിതരണം ചെയ്ത സാധനങ്ങളുടെ വിലയ്ക്കും സംഭരണ ചാര്ജിനുമായി 2.48 കോടി കെഎസ്ഇബി അനുവദിച്ചു. എന്നാല് പദ്ധതി നടപ്പാകാത്തതിനെ തുടര്ന്നുള്ള മൊത്തം നഷ്ടം ഇതുവരെ കണക്കാക്കിയിട്ടില്ല.
5.82 കോടി ചെലവ് വരുന്ന കാസര്കോട് ജില്ലയിലെ മൈലാട്ടി 220 കെവി സബ്സ്റ്റേഷനിലെ ഒരു മെഗാവാട്ട് ഗ്രിഡ് ബന്ധിത സോളാര് പദ്ധതി നടപ്പാക്കാത്തതിനെ തുടര്ന്ന് കെഎസ്ഇബിക്ക് 1.58 കോടി നഷ്ടമുണ്ടായതായും രേഖകളില് പറയുന്നു. കെഎസ്ഇബി സോളാര് പ്രോജക്ട് പബ്ലിക് ഇന്ഫര്മേഷന് ഓഫീസര് നല്കിയ മറുപടിയിലാണ് ഇക്കാര്യം വ്യക്തമാക്കുന്നത്.
വൈദ്യുതി നിരക്ക് കൂട്ടാന് ബോര്ഡ് ന്യായങ്ങള് കണ്ടെത്തുമ്പോള് ഇതിന് ഉത്തരവാദികളായ ഉദ്യോഗസ്ഥരില് നിന്നും കരാറുകാരില് നിന്നും കെഎസ്ഇബി തുക ഈടാക്കാത്തത് എന്തുകൊണ്ടാണെന്ന് കെ. ഗോവിന്ദന് നമ്പൂതിരി ചോദിക്കുന്നു. മന്ത്രിയും കെഎസ്ഇബിയും ഇക്കാര്യത്തില് മറുപടി പറയണമെന്നും നഷ്ടത്തിന് ഉത്തരവാദികളായ ഉദ്യോഗസ്ഥരില് നിന്ന് തുക ഈടാക്കി വൈദ്യുതി ബില്ലില് കുറവ് വരുത്തണമെന്നും അദ്ദേഹം ആവശ്യപ്പെട്ടു.
