തിരുവനന്തപുരം: വാര്ഷിക പരീക്ഷയ്ക്ക് മിനിമം മാര്ക്ക് ലഭിക്കാത്ത കുട്ടികള്ക്കുള്ള പഠനപിന്തുണ അടിസ്ഥാനത്തിലുള്ള പുനര് മൂല്യനിര്ണയം ഏപ്രില് 28, 29, 30 തീയതികളില് നടത്തും. മെയ് രണ്ടിന് പ്രമോഷന് ലിസ്റ്റ് പ്രസിദ്ധീകരിക്കും.
പഠനപിന്തുണ ക്ലാസുകളുടെ ഭാഗമായുള്ള വിലയിരുത്തല് പരീക്ഷയുടെ സ്കോറും സമയവും ആകെ സ്കോറിന്റെയും സമയത്തിന്റെയും പകുതിയായി നിജപ്പെടുത്തും. പൊതുവിദ്യാഭ്യാസ വകുപ്പ് നല്കുന്ന ചോദ്യപേപ്പറുകളില് ആവശ്യമായ അനുരൂപീകരണം വിദ്യാലയ തലത്തില് വരുത്തി പുനഃപരീക്ഷ നടത്തണം.
കന്നട, തമിഴ് മീഡിയം ചോദ്യപേപ്പര് സ്കൂള് തലത്തില് തയ്യാറാക്കണം. അധ്യാപകര് അവരുടെ വിഷയത്തില് നല്കിയ പഠന പിന്തുണയ്ക്ക് അനുസൃതമായി ചോദ്യപേപ്പറുകളില് അനുരൂപീകരണം നടത്തണം. ഉഷ്ണ തരംഗം മൂലം പഠന പിന്തുണ ക്ലാസുകള് നല്കാന് കഴിയാത്ത ജില്ലകളില് പിന്തുടര്ന്ന രീതി അനുസരിച്ച് പ്രമോഷന് നല്കും. അത്തരം കുട്ടികള്ക്ക് സ്കൂള് തുറന്നതിനുശേഷം ആവശ്യമായ ബ്രിഡ്ജിങ് നല്കണം. വിദ്യാര്ത്ഥികളുടെ പുനഃ പരീക്ഷ സ്കോറുകള് സമ്പൂര്ണ പ്ലസ് വെബ്സൈറ്റില് അപ്ഡേറ്റ് ചെയ്യണം. പുനഃപരീക്ഷയും ഉത്തരക്കടലാസിന്റെ മൂല്യനിര്ണയവും കൃത്യതയോടെ സമയബന്ധിതമായി എല്ലാ വിദ്യാലയങ്ങളും പൂര്ത്തീകരിക്കുന്നുവെന്ന് വിദ്യാഭ്യാസ ഓഫീസര്മാര് ഉറപ്പുവരുത്തേണ്ടതാണെന്നും വിദ്യാഭ്യാസവകുപ്പ് നിര്ദ്ദേശിച്ചിട്ടുണ്ട്.
