കാലടി: കാലടി ശ്രീശങ്കരാചാര്യ സംസ്കൃത സര്വകലാശാലയില് നിന്നും കഴിഞ്ഞ പത്ത് വര്ഷത്തിനിടയില് വ്യാജ ഡിഗ്രി സര്ട്ടിഫിക്കറ്റുകളും പിഎച്ച്ഡികളും നല്കിയിട്ടുള്ളതായി ആരോപണം. സിപിഎം അദ്ധ്യാപക-അനദ്ധ്യാപക സംഘടനകളുടെ നേതൃത്വത്തിലാണ് ഇതൊക്കെയും നടന്നിട്ടുള്ളതിനാല് ജീവനക്കാര് ഭീതിയിലാണ്. പാര്ട്ടി നിര്ദേശപ്രകാരം എസ്എഫ്ഐ പ്രവര്ത്തകര്ക്കും നേതാക്കള്ക്കുമാണ് ഡിഗ്രി സര്ട്ടിഫിക്കറ്റുകള് നല്കിയതെന്നാണ് അറിയുന്നത്.
ബിഎഫ്എ തോറ്റ വിദ്യാര്ത്ഥിയെ ജയിപ്പിച്ചതിന്മേലുള്ള അന്വേഷണം ആരംഭിച്ചതോടെ സംഘടന നേതാക്കള് പരിഭ്രാന്തിയിലാണ്. കഴിഞ്ഞ ദിവസം മാധ്യമ വാര്ത്തകള്ക്കെതിരെ സിപിഎം നേതൃത്വത്തിലുള്ള അനദ്ധ്യാപക സംഘടന പ്രകടനം നടത്തിയിരുന്നു. സര്വകലാശാലയിലെ സിപിഎം അനുകൂല സംഘടനകളുടെ മറവില് പാര്ട്ടി നടത്തുന്ന സൗജന്യ ബിരുദ ദാനങ്ങള് പാര്ട്ടിക്കുള്ളിലും ചര്ച്ചയായിട്ടുണ്ട്. വര്ഷങ്ങളായി സ്പോട്ട് അഡ്മിഷന്റെ മറവിലാണ് യോഗ്യത ഇല്ലാത്തവര്ക്കും സര്വകലാശാലയില് അഡ്മിഷന് നല്കുന്നത്. ഇതിലൂടെയാണ് സര്വകലാശാലയില് കുട്ടികളുടെ എണ്ണം തികച്ചിരുന്നത്. ഓരോ വര്ഷവും അഡ്മിഷന് നേടുന്നവരില് 25ശതമാനം മാത്രമാണ് പരീക്ഷയെഴുതാറുള്ളൂ എന്ന കണക്ക് പുറത്ത് വന്നപ്പോഴാണ് സര്വകലാശാലയിലെ അഡ്മിഷന് തട്ടിപ്പ് പുറത്തായത്. എണ്ണം കാണിക്കുന്നതിനായി വ്യാജ അഡ്മിഷന് നടത്തുന്നതില് ചാന്സലര് കൂടിയായ ഗവര്ണര് ഇടപെടുമെന്ന് അറിഞ്ഞതോടെ സര്വകലാശാലയിലെ പല അദ്ധ്യാപകരും ‘ഒറിജിനല്’ കുട്ടികള്ക്കായി നെട്ടോട്ടത്തിലാണ്.
സര്വകലാശാലയിലെ ഇന്റേണല് ക്വാളിറ്റി അഷ്വറന്സ് സെല്ലിന്റെ ഒത്താശയോടെയാണ് ഈ അഡ്മിഷന് തട്ടിപ്പ് നടത്തുന്നതെന്നാണ് ആരോപണം. കഴിഞ്ഞ പത്ത് വര്ഷത്തെ അഡ്മിഷന്, പരീക്ഷ രജിസ്ട്രേഷന് കണക്കുകള് വൈസ് ചാന്സലര് ആവശ്യപ്പെടുമെന്ന് ഉറപ്പായതോടെ സര്വകലാശാല ജീവനക്കാര് പരിഭ്രാന്തിയിലാണ്.
