അഭിനയത്തിലും എഴുത്തിലും ഒരേപോലെ തിളങ്ങുന്ന ശബരീഷ് വര്മ്മയുടെ തൂലികയില് വിരിഞ്ഞ ‘വാഴ 2’ വിലെ ‘തൂക്കി’ എന്ന ഗാനം സോഷ്യല് മീഡിയയില് തരംഗമാകുമ്പോള് മലയാള സിനിമാ ലോകം വീണ്ടും ഈ പ്രതിഭയെ നെഞ്ചേറ്റുകയാണ്. യുവത്വത്തിന്റെ പള്സ് തൊട്ടറിയുന്ന ഗാനരചയിതാവ് എന്ന വിശേഷണം ശബരീഷിന് തികച്ചും അനുയോജ്യമാണെന്ന് ഈ ഗാനത്തിന്റെ വിജയം അടിവരയിടുന്നു.
പുതുതലമുറയെ ലക്ഷ്യമിട്ടുള്ള സിനിമയാണെങ്കിലും, അമിതമായ ഇംഗ്ലീഷ് പ്രയോഗങ്ങളുടെ അതിപ്രസരമില്ലാതെ ‘ആദ്യാനുരാഗം’, ‘ആപാദചൂഡം’ തുടങ്ങിയ ശുദ്ധമലയാള പദങ്ങള് ഗാനത്തില് ഉള്പ്പെടുത്തിയത് ഈ രചയിതാവിന്റെ ഭാഷാപ്രേമത്തിന് തെളിവാണ്. ‘CAUGHT IN RED HAND’ എന്ന പ്രയോഗത്തെ അര്ത്ഥം ചോരാതെ ‘തൂക്കി ചുവന്ന കരങ്ങളോടെ’ എന്ന് പരിഭാഷപ്പെടുത്തിയ ശബരീഷിന്റെ രചനാ കൗശലം സിനിമാപ്രേമികള്ക്കിടയില് വലിയ പ്രശംസ പിടിച്ചുപറ്റിയിട്ടുണ്ട്. വരികളിലെ ഈ ലാളിത്യവും ആഴവും ചിത്രത്തെ 75 കോടി ക്ലബ്ബിലേക്ക് നയിക്കുന്നതില് നിര്ണ്ണായക പങ്കുവഹിച്ചു.
2013-ല് ‘നേരം’ എന്ന ചിത്രത്തിലെ ‘പിസ്ത സുമകിറ…’ എന്ന സൂപ്പര്ഹിറ്റ് ഗാനത്തിലൂടെ അരങ്ങേറ്റം കുറിച്ച ശബരീഷ്, പിന്നീട് ‘പ്രേമം’ എന്ന ചിത്രത്തിലൂടെയാണ് മലയാളികളുടെ പ്രിയങ്കരനായി മാറിയത്. ‘മലരേ നിന്നെ കാണാതിരുന്നാല്…’ ഏറെ പ്രശസ്തമായ വരികളിലൂടെ പ്രണയത്തിന്റെയും വിരഹത്തിന്റെയും പുതിയ അനുഭവം മലയാളിക്ക് നല്കാന് ശബരീഷിന് സാധിച്ചു. ‘പ്രേമ’ത്തിലെ ഒന്പത് പാട്ടുകളും രചിച്ച ശബരീഷ് അതിലെ ‘ശംഭു’ എന്ന കഥാപാത്രത്തിലൂടെ മികച്ച നടനാണെന്നും തെളിയിച്ചു. സീന് കോണ്ട്രാ…, ആലുവാ പുഴയുടെ തീരത്ത്… അലരേ നീയെന്നിലെ ഒളിയായ് മാറിടുമോ… (മെമ്പര് രമേശന്), അരികില് നിന്നരികില് നിന്നകലാതിരിക്കാം… (റോക്ക് സ്റ്റാര്), ‘വാനില് ചന്ദ്രികാ തെളിഞ്ഞിതാ… (ലൂക്ക), പഞ്ച് ട്രിപ്പിള് പഞ്ച്… (ജയ ജയ ജയ ജയ ഹേ) തുടങ്ങി എത്രയോ ഹിറ്റ് ഗാനങ്ങളാണ് ശബരീഷിന്റെ തൂലികയില് നിന്ന് പിറന്നത്.
ഗാനരചയിതാവ് എന്നതിലുപരി നടനായും ശബരീഷ് വ്യക്തിമുദ്ര പതിപ്പിച്ചു കഴിഞ്ഞു. നേരം, പ്രേമം എന്നീ ചിത്രങ്ങള്ക്ക് ശേഷം തൊബാമ, വാസന്തി, മെമ്പര് രമേശന് 9-ാം വാര്ഡ്, ഉപചാരപൂര്വ്വം ഗുണ്ടാ ജയന്, ഗോള്ഡ്, ഓ മേരീ ലൈലാ, ധീരന്, പ്രാവിന്കൂട് ഷാപ്പ്, സാഹസം, പാതിരാത്രി, ഇന്സ്പെക്ഷന് ബംഗ്ലാവ് തുടങ്ങി നിരവധി ചിത്രങ്ങളില് ശബരീഷ് അഭിനയിച്ചു. മെഗാസ്റ്റാര് മമ്മൂട്ടിയോടൊപ്പം കണ്ണൂര് സ്ക്വാഡ്, ടര്ബോ എന്നീ ചിത്രങ്ങളില് ശ്രദ്ധേയമായ വേഷങ്ങള് ചെയ്തതോടെ മലയാളത്തിലെ യുവനായക നിരയില് ശബരീഷ് സ്ഥാനം ഉറപ്പിച്ചു. അഭിനയത്തിനും എഴുത്തിനും പുറമെ മികച്ച ഗായകന് കൂടിയായ ശബരീഷ് കേരള ബ്ലാസ്റ്റേഴ്സിന്റെ ആരാധകക്കൂട്ടായ്മയായ ‘മഞ്ഞപ്പട’യുടെ ഔദ്യോഗിക ഗാനവും ആലപിച്ചിട്ടുണ്ട്.
എറണാകുളം ജില്ലയിലെ വടക്കന് പറവൂര് സ്വദേശിയായ ശബരീഷിന്റെ കലാവൈഭവം കുടുംബത്തില് നിന്ന് തന്നെ പകര്ന്നു കിട്ടിയതാണ്. ഇന്ത്യന് റെയില്വേ ബോര്ഡ് മുന് ഉദ്യോഗസ്ഥന് പരേതനായ പി.കെ. നന്ദന വര്മ്മയുടെയും അധ്യാപികയായ സുലേഖ വര്മ്മയുടെയും മകനായ ശബരീഷിനെ വീട്ടുകാര് ‘ഛബ്ബി’ എന്നാണ് വിളിക്കുന്നത്. പ്രശസ്ത വയലിനിസ്റ്റ് കൂടിയായ അമ്മ സുലേഖ വര്മ്മ വയലാര് രാമവര്മ്മയുടെ അകന്ന ബന്ധുവാണ്. പിതാവ് പി.കെ. നന്ദന വര്മ്മയാകട്ടെ, ഭരത് ഗോപി-മാധവി കൂട്ടുകെട്ടില് പുറത്തിറങ്ങിയ ‘അക്കരെ’ എന്ന ചിത്രത്തിന്റെ കഥാകൃത്തും പ്രശസ്ത എഴുത്തുകാരനുമാണ്. മാതാപിതാക്കളുടെ ഈ രചനാ-സംഗീത വാസനകളുടെ സമന്വയമാണ് ശബരീഷിലെ കലാകാരന്.
ആലുവ എംഇഎസ് കോളജില് നിന്ന് ബിരുദവും ചെന്നൈയില് നിന്ന് ഓഡിയോ എന്ജിനീയറിങ്ങില് ഡിപ്ലോമയും നേടിയ ശബരീഷ് തെന്നിന്ത്യന് സിനിമകളില് സൗണ്ട് എഞ്ചിനീയറായും പ്രവര്ത്തിച്ചിട്ടുണ്ട്. തെന്നിന്ത്യയിലെ പ്രശസ്ത പ്രൊഡക്ഷന് ഡിസൈനര് അശ്വിനി കലേയാണ് ശബരീഷിന്റെ ഭാര്യ. റായ ശബരീഷ് മകളാണ്. സവിന് എസ്.എ സംവിധാനം ചെയ്ത ‘വാഴ 2’ ബോക്സ് ഓഫീസില് 100 കോടി ക്ലബ്ബിലേക്ക് കുതിക്കുമ്പോള്, വരികളിലെ സ്വാഭാവികതയും ‘യൂത്ത് വൈബും’ നിലനിര്ത്തി ശബരീഷ് വര്മ്മ തന്റെ കരിയറിലെ മറ്റൊരു സുവര്ണ്ണ അധ്യായം കൂടി രചിക്കുകയാണ്.
ജന്മഭൂമി ഓണ്ലൈന്