ടെഹ്റാന്: ഇറാന്റെ പരമോന്നത നേതാവ് മൊജ്താബ ഖമേനി ഗുരുതരമായി പരിക്കേറ്റ് രഹസ്യതാവളത്തില് കഴിയുകയാണെന്ന് റിപ്പോര്ട്ട്. ഇദ്ദേഹം പുറംലോകവുമായി ബന്ധപ്പെടുന്നില്ലെന്നും ന്യൂയോര്ക്ക് ടൈംസ് പുറത്തുവിട്ട റിപ്പോര്ട്ടില് പറയുന്നു.
കഴിഞ്ഞ ഫെബ്രുവരി 28ന് ഉണ്ടായ യുഎസ്- ഇസ്രയേല് സംയുക്ത വ്യോമാക്രമണത്തില് ഇറാന്റെ മുന് പരമോന്നത നേതാവ് ആയത്തുള്ള അലി ഖമേനി കൊല്ലപ്പെടുകയും മൊജ്താബക്ക് പരിക്കേല്ക്കുകയും ചെയ്തിരുന്നു. ഒരു കാലിന് മൂന്ന് ശസ്ത്രക്രിയകള് നടത്തിയെങ്കിലും കാല് മുറിച്ച് മാറ്റി കൃത്രിമ കാല് വെക്കേണ്ടി വരുമെന്നാണ് ഔദ്യോഗിക വൃത്തങ്ങള് വ്യക്തമാക്കുന്നത്. സംസാരിക്കാന് പ്രയാസമുള്ള രീതിയില് താടിയെല്ലിനും പരിക്കേറ്റു. ഇതിന് പ്ലാസ്റ്റിക് സര്ജറിയും നടത്തിയിട്ടുണ്ട്.
രഹസ്യതാവളത്തില് കഴിയുന്ന മൊജ്താബ വിശ്വസ്ത ദൂതന്മാര് വഴിയാണ് ആശയവിനിമയം നടത്തുന്നത്. ഇറാന് പ്രസിഡന്റും ഹൃദയ ശസ്ത്രക്രിയാ വിദഗ്ധനുമായ മസൂദ് പെസെഷ്കിയാനാണ് മൊജ്താബയുടെ ചികിത്സക്ക് മേല്നേട്ടം വഹിക്കുന്നത്.
മൊജ്താബയുടെ അഭാവത്തില് ഭരണപരമായ തീരുമാനങ്ങള് എടുക്കുന്നത് ഇറാനിലെ ഐആര്ജിസി കമാന്ഡര്മാരാണെന്നാണ് റിപ്പോര്ട്ട്. യുദ്ധം, നയതന്ത്രം, ദേശീയ സുരക്ഷ എന്നീ കാര്യങ്ങളില് സൈനിക ജനറല്മാരാണ് ഇപ്പോള് അവസാന വാക്ക്.
