രാജാക്കാട്: പഞ്ചായത്തിലെ മുല്ലക്കാനത്തുള്ള മൈലംപറമ്പില്‍ ഷാജിയുടെ വീടിന്റെ ഉമ്മറത്ത് ടൈല്‍ വിരിച്ച ഭാഗത്ത് എല്ലാ ദിവസവും വെളുപ്പിന് ഒരു മൂര്‍ഖന്‍ പാമ്പ് വന്ന് കിടക്കാറുണ്ട്. വെളുപ്പിന് 4ന് നടക്കാനിറങ്ങുന്ന ഷാജി ഇതിനെ സ്ഥിരമായി കാണാന്‍ തുടങ്ങിയതോടെ കുടിവെള്ളം വെച്ച് കൊടുക്കുന്നതും പതിവായി. ഏകദേശം അര ലിറ്ററോളം വെള്ളം കുടിക്കുന്ന ഈ പാമ്പിന് നല്ല വലിപ്പവും ഏകദേശം 20 കിലോഗ്രാമോളം തൂക്കവും വരുമെന്നാണ് ബന്ധപ്പെട്ട ഉദ്യോഗസ്ഥര്‍ പറഞ്ഞത്.
പാമ്പിന് കുടിവെള്ളം കൊടുത്ത ശേഷം നടക്കാന്‍ പോകുന്ന ഷാജി തിരികെയെത്തുമ്പോള്‍ ഇതിനെ കാണാറില്ലായിരുന്നു. അതിന്റെ മാളത്തിലേക്ക് പോയിട്ടുണ്ടെന്ന നിഗമനമാണ് ഷാജിക്കും കുടുംബത്തിനുമുള്ളത്. പ്രകൃതി സ്‌നേഹിയും കര്‍ഷക വിദഗ്‌ദ്ധനുമായ ഷാജിയും ആ വിശ്വാസത്തിലായിരുന്നു. എന്നാല്‍ കഴിഞ്ഞ ദിവസം പാറക്കല്ലൂകള്‍ക്കിടയില്‍ വീടിന് സമീപത്ത് പാമ്പ് ചത്തു കിടക്കുന്നതായി കണാനിടയായി.
പാറക്കല്ലുകള്‍ക്കിടയില്‍ ചൂടില്‍ പെട്ട് ചത്തതാണെന്ന നിഗമനത്തില്‍ ഇതിന്റെ ജഡം സ്വന്തം പുരയിടത്തില്‍ കുഴിച്ചിട്ടിരുന്നു. എന്നാല്‍ ഇതിനു ശേഷം മറ്റൊരു മൂര്‍ഖന്‍ ഈ കുഴിമാടത്തില്‍ വന്ന് പത്തി ഉയര്‍ത്തിക്കിടക്കുന്ന കാഴ്ചയാണ് ഷാജി കാണുന്നത്. കഥയറിയാത്ത ഷാജി പഴയതു പോലെ കുടിവെള്ളം കൊടുത്തെങ്കിലും ഇത് കുടിക്കാന്‍ തയ്യാറായില്ലെന്ന് മാത്രമല്ല ആരെയും ആ ഭാഗത്തേക്ക് അടുക്കാനും സമ്മതിക്കാതായി. പ്രശ്‌നം ഗുരുതരമാണെന്ന് മനസിലാക്കിയ ഷാജി പ്രദേശത്തെ വനം വകുപ്പിന്റെ അംഗീകാരമുള്ള പാമ്പുകളെ പിടിക്കുന്ന തകടിക്കല്‍ മനോജിനെ വിവരമറിയിക്കുകയായിരുന്നു.
മനോജ് സ്ഥലത്തെത്തി കുറെ നേരത്തെ പരിശ്രമത്തിനൊടുവിലാണ് ഇതിനെ കൂട്ടിലാക്കാന്‍ കഴിഞ്ഞത്. പാമ്പ് ഒന്നല്ല ഉണ്ടായിരുന്നതെന്നും രണ്ടെണ്ണമുണ്ടായിരുന്നെന്നും ഇതിന്റെ ഇണയാണ് ചത്തതെന്നും അതിന്റെ പ്രകോപനമാണ് ഇപ്പോള്‍ എത്തിയ പാമ്പ് പ്രകടിപ്പിച്ചതെന്നുമാണ് മനോജ് പറയുന്നത്.
