കൊല്‍ക്കത്ത: പശ്ചിമബംഗാളില്‍ വ്യാഴാഴ്ച നടന്ന ഒന്നാം ഘട്ട നിയമസഭാ തെരഞ്ഞെടുപ്പിലും തമിഴ്‌നാട്ടില്‍ ഒറ്റഘട്ടമായി നടന്ന നിയമസഭ തെരഞ്ഞെടുപ്പിലും റെക്കോഡ് പോളിംഗ്. ഇതുവരെയുള്ള കണക്കുകള്‍ പ്രകാരം പശ്ചിമബംഗാളില്‍ 92.03 ശതമാനമാണ് പോളിംഗ്. വടക്കന്‍ ബംഗാള്‍ ഉള്‍പ്പടെ 16 ജില്ലകളിലായി 152 മണ്ഡലങ്ങളിലെ ജനങ്ങളാണ് പോളിംഗ് ബൂത്തിലെത്തിയത്.
ഏപ്രില്‍ 29ന് ആണ് പശ്ചിമബംഗാളില്‍ രണ്ടാംഘട്ട തെരഞ്ഞെടുപ്പ്. 142 മണ്ഡലങ്ങളിലാണ് രണ്ടാംഘട്ടത്തില്‍ വോട്ടെടുപ്പ് നടക്കുക. 2021 ല്‍ സംസ്ഥാനത്ത് 82.64 ശതമാനമായിരുന്നു ആകെ പോളിംഗ്. പോളിംഗ് സമയം കഴിഞ്ഞെങ്കിലും ആറ് മണിക്കുള്ളില്‍ ബൂത്തിലെത്തിയവരെ സ്ലിപ്പ് നല്‍കി വോട്ട് ചെയ്യാന്‍ അനുവദിച്ചു.
അന്തിമ കണക്കുകള്‍ പുറത്തുവരുമ്പോള്‍ വോട്ടെടുപ്പ് കണക്കുകളില്‍ വ്യത്യാസം ഉണ്ടാകും.
തമിഴ്‌നാട്ടിലും റെക്കോര്‍ഡ് പോളിംഗ് ആണ് രേഖപ്പെടുത്തിയത്. ഏറ്റവും ഒടുവില്‍ ലഭിച്ച വിവരം അനുസരിച്ച് 85.03 ആണ് പോളിംഗ്. 85.76 സ്ത്രീകളാണ് തമിഴ്‌നാട്ടില്‍ വോട്ട് രേഖപ്പെടുത്തിയത്.
തമിഴ്‌നാട് രാഷ്‌ട്രീയ ചരിത്രത്തില്‍ ആദ്യമായാണ് 80 ശതമാനം പോളിംഗ് കടക്കുന്നത്. 2021ല്‍ ഉണ്ടായിരുന്നതിനേക്കാള്‍11 ശതമാനത്തോളം വര്‍ധനയാണ് രേഖപ്പെടുത്തിയത്.
