കൊല്ലം: വനിതാ ബില് പരാജയപ്പെടുത്തിയ ഇന്ഡി മുന്നണിയുടെ നടപടി സ്ത്രീകളോടുള്ള വഞ്ചനയും വെല്ലുവിളിയുമാണെന്ന് ബിജെപി സംസ്ഥാന വക്താവ് കേണല് എസ്. ഡിന്നി. കൊട്ടാരക്കരയില് മാധ്യമങ്ങളോട് സംസാരിക്കുകയായിരുന്നു അദ്ദേഹം.
വനിതകള്ക്കെതിരെയുള്ള മുന്നണി അജണ്ടയാണ് കോണ്ഗ്രസ് സഖ്യം പാര്ലമെന്റില് കാണിച്ചത്. വനിതാസംവരണം ഔദാര്യമല്ല, അവര്ക്ക് അര്ഹതപ്പട്ടതാണെന്നും അത് നേടിയെടുക്കാന് നരേന്ദ്രമോദിക്കൊപ്പം നിലകൊള്ളുമെന്നും അദ്ദേഹം പറഞ്ഞു. കോണ്ഗ്രസ്- സിപിഎം സ്ത്രീവിരുദ്ധ നിലപാടിനെതിരെ ശക്തമായ പ്രക്ഷോഭത്തിന് ബിജെപി ഒരുങ്ങുകയാണ്. പ്രതിപക്ഷത്തിന്റെ സ്ത്രീവിരുദ്ധ നിലപാടുകള്ക്കെതിരെ ശക്തമായ പ്രതിഷേധ പരിപാടികള് സംഘടിപ്പിക്കും.
ഭാരതത്തിലെ 50 ശതമാനം വരുന്ന സ്ത്രീസമൂഹത്തിന് നിയമനിര്മാണ സഭകളില് അര്ഹമായ പ്രാതിനിധ്യം ഉറപ്പാക്കാന് ലക്ഷ്യമിട്ടുള്ള നാരിശക്തി വന്ദന് അധിനിയം തടസപ്പെടുത്താനുള്ള നീക്കം സ്ത്രീസമൂഹത്തോടുള്ള വെല്ലുവിളിയാണ്. സ്ത്രീശക്തിക്ക് ആദരവും ബഹുമാനവും നല്കുന്ന ഭാരതത്തില് സ്ത്രീകള്ക്ക് ഭരണസംവിധാനങ്ങളില് ലഭിക്കേണ്ട അവസരങ്ങള് നിഷേധിക്കുന്നത് ഖേദകരമാണ്. മറ്റ് വനിതകള് രാഷ്ട്രീയത്തില് മുന്നോട്ട് വരുന്നതിനോ അവര്ക്ക് അവസരങ്ങള് നല്കാനോ താല്പര്യമില്ലാത്ത കുടുംബാധിപത്യ പാര്ട്ടികളാണ് ബില്ലിനെ എതിര്ക്കുന്നത്. അവര് യാഥാര്ത്ഥ്യങ്ങള് മറച്ചുവയ്ക്കുന്നു. 42-ാം ഭേദഗതിയും 84-ാം ഭേദഗതിയും സൃഷ്ടിച്ച സാങ്കേതിക തടസങ്ങള് നീക്കി 2026ന് ശേഷം വനിതാസംവരണം നടപ്പിലാക്കാനുള്ള ആദ്യ ചുവടുവെപ്പായിരുന്നു കേന്ദ്രസര്ക്കാരിന്റെ ലക്ഷ്യം. എന്നാല് രാഷ്ട്രീയ സ്വാര്ത്ഥ ലാഭത്തിനായി പ്രതിപക്ഷം ഇത് തടയുകയാണ്. എല്ലാ മണ്ഡലങ്ങളിലും ഒപ്പുശേഖരണവും പോസ്റ്റുകാര്ഡ് നിവേദനങ്ങള് അയക്കുന്ന പരിപാടിയും മഹിളാമുന്നേറ്റ റാലിയും ഇതോടനുബന്ധിച്ച് സംഘടിപ്പിക്കുമെന്നും അദ്ദേഹം പറഞ്ഞു.
വാര്ത്താസമ്മേളനത്തില് ബിജെപി ഈസ്റ്റ് ജില്ലാ പ്രസിഡന്റ് രാജിപ്രസാദ്, മഹിളാമോര്ച്ച ജില്ലാ പ്രസിഡന്റ് രേഖ അജേന്ദ്രന്, നെടുവത്തൂര് പഞ്ചായത്ത് പ്രസിഡന്റ് വിദ്യ, ആര്. രശ്മി, ജില്ലാസെക്രട്ടറി സുനിത, ജില്ലാ ജനറല് സെക്രട്ടറി ആലഞ്ചേരി ജയചന്ദ്രന്, കൊട്ടാരക്കര മണ്ഡലം പ്രസിഡന്റ് അനീഷ് കിഴക്കേക്കര എന്നിവര് പങ്കെടുത്തു.
