ന്യൂദല്ഹി: മധ്യപ്രദേശില് നിന്നുള്ള പ്രായപൂര്ത്തിയാകാത്ത വൈറല്താരമായ പെണ്കുട്ടിയുടെ ഭര്ത്താവ് ഫര്മാന് ഖാനെതിരെ പോക്സോ കേസ് എടുക്കാന് നിര്ദേശം. ദേശീയ പട്ടികവര്ഗ കമ്മിഷന് ഇന്നലെ നടത്തിയ സിറ്റിങ്ങില് ഫര്മാനെതിരെ പോക്സോ നിയമപ്രകാരം കേസെടുക്കാന് മധ്യപ്രദേശ് പോലീസിന് നിര്ദേശം നല്കിയതായി പരാതിക്കാരന് അഡ്വ. പ്രഥം ദുബെ മാധ്യമങ്ങളോട് പറഞ്ഞു.
പെണ്കുട്ടിക്ക് പ്രായപൂര്ത്തിയായിട്ടില്ലെന്ന് വ്യക്തമായിട്ടും പ്രതിയെ അറസ്റ്റ് ചെയ്യാന് വൈകുന്നതെന്താണെന്ന് കമ്മിഷന് ചെയര്പേഴ്സണ് അന്തര് സിങ് ആര്യ ചോദിച്ചതായും പ്രഥം ദുബെ പറഞ്ഞു. ഇരുപോലീസ് മേധാവിമാരും വീണ്ടും റിപ്പോര്ട്ട് നല്കണമെന്നും കമ്മിഷന് നിര്ദേശിച്ചു. എന്നാല് ഇരു പോലീസ് സേനകളുടെയും അന്വേഷണത്തില് കമ്മിഷന് അതൃപ്തി രേഖപ്പെടുത്തി.
പെണ്കുട്ടിക്ക് പ്രായപൂര്ത്തിയായില്ല എന്ന് ദേശീയ പട്ടികവര്ഗ കമ്മിഷന് നേരത്തെ കണ്ടെത്തിയിരുന്നു. ഈ സാഹചര്യത്തില് വിവാഹത്തെ സംബന്ധിച്ച് അന്വേഷണം നടത്തി റിപ്പോര്ട്ട് നല്കാന് മധ്യപ്രദേശ് പോലീസിനും കേരള പോലീസിനും നിര്ദേശം നല്കുകയായിരുന്നു. കമ്മിഷന്റെ നിര്ദേശപ്രകാരം ഇരുസംസ്ഥാനങ്ങളിലെയും ഉന്നത പോലീസ് ഉദ്യോഗസ്ഥര് ഇന്നലെ ഹാജരായി. കേസില് അന്വേഷണം പൂര്ത്തിയായില്ലെന്ന് മധ്യപ്രദേശ് പോലീസ് റിപ്പോര്ട്ട് നല്കി. പെണ്കുട്ടിയുടെ മൊഴി രേഖപ്പെടുത്താന് കേരളത്തില് എത്തിയെങ്കിലും അതിന് സാധിച്ചില്ലെന്നും കൂടുതല് അന്വേഷണം ആവശ്യമാണെന്നും മധ്യപ്രദേശ് പോലീസ് അറിയിച്ചു. പെണ്കുട്ടിയുടെ പ്രായം തെളിയിക്കുന്നതിനായി ഹാജരാക്കിയ രേഖകള് പരിശോധിച്ച് ആധികാരികത ഉറപ്പാക്കിയിരുന്നെന്നും തങ്ങളുടെ ഭാഗത്തുനിന്ന് വീഴ്ചയുണ്ടായിട്ടില്ലെന്നും കേരള പോലീസ് കമ്മിഷനെ അറിയിച്ചു. ഡിജിപിയുടെ പ്രതിനിധിയായി തിരുവനന്തപുരം റെയ്ഞ്ച് ഡിഐജി ജെ. ഹിമേന്ദ്രനാഥാണ് ഹാജരായത്.
പെണ്കുട്ടിയുടെ മാതാപിതാക്കളും ഇന്നലെ കമ്മിഷന് മുന്നില് ഹാജരായിരുന്നു. മകളെ തിരികെ ലഭിക്കണമെന്നും സിനിമയില് അഭിനയിപ്പിക്കാമെന്ന വാഗ്ദാനം നല്കി കടത്തിക്കൊണ്ടു പോവുകയായിരുന്നുവെന്നും പെണ്കുട്ടിയുടെ അമ്മ പ്രതികരിച്ചു. നേരത്തെ പെണ്കുട്ടിയുടെ മാതാപിതാക്കള് നല്കിയ പരാതിയുടെ അടിസ്ഥാനത്തില് ഫര്മാനെതിരെ തട്ടിക്കൊണ്ടുപോകലിന് കേസെടുത്തിരുന്നു. ഈ കേസില് നിലവില് കേരള ഹൈക്കോടതി മുന്കൂര് ജാമ്യം നല്കിയിട്ടുണ്ട്
