വാഷിങ്ടണ്: ചൊവ്വയില് ജൈവ തന്മാത്രകള് കണ്ടെത്തി നാസയുടെ ക്യൂരിയോസിറ്റി റോവര്. 2020ല് ചൊവ്വയിലെ മൗണ്ട് ഷാര്പ്പ് മേഖലയില് നിന്ന് ശേഖരിച്ച മേരി ആനിങ് 3 എന്ന ശിലയെക്കുറിച്ചുള്ള പഠന റിപ്പോര്ട്ടുകളാണ് നാസ ഇപ്പോള് പുറത്തുവിട്ടിരിക്കുന്നത്. ആകെ കണ്ടെത്തിയ 21 തന്മാത്രകളില് ഏഴെണ്ണം ആദ്യമായാണ് ചൊവ്വയുടെ ഉപരിതലത്തില് തിരിച്ചറിയുന്നത്. മേരി ആനിങ് എന്ന ഈ പ്രദേശം ശതകോടി വര്ഷങ്ങള്ക്ക് മുന്പ് തടാകങ്ങളും അരുവികളും നിറഞ്ഞതായിരുന്നു.
പിന്നീട് ഈ പ്രദേശത്ത് മരുപ്പച്ച പലതവണ ഉയര്ന്നുവന്ന് ഉണങ്ങിപ്പോയി. എങ്കിലും കളിമണ് ധാതുക്കളാല് ഈ പ്രദേശത്തെ സമ്പുഷ്ടമാക്കി, ജൈവ സംയുക്തങ്ങളെ സംരക്ഷിച്ചതും ഈ ജൈവ തന്മാത്രകളാണ്. ജീവന്റെ അടിസ്ഥാന ശിലകളായി കണക്കാക്കപ്പെടുന്ന കാര്ബണ് സംയുക്തങ്ങളാണ് ഇവയെങ്കിലും, ഏതെങ്കിലും ജീവജാലങ്ങളില് നിന്ന് രൂപപ്പെട്ടതാണോ അതോ പരിണാമ പ്രക്രിയകളിലൂടെ ഉണ്ടായതാണോ എന്ന് നിലവില് സ്ഥിരീകരിക്കാനായിട്ടില്ല.
കണ്ടെത്തിയവയില് നൈട്രജന് ഹെറ്ററോസൈക്കിള് എന്ന തന്മാത്രയുടെ സാന്നിധ്യമാണ് ഗവേഷകരില് ഏറെ ആകാംഷ നിറച്ചത്. ഡിഎന്എ, ആര്എന്എ എന്നിവയുടെ രൂപീകരണത്തിന് മുന്നോടിയായി ഉണ്ടാകുന്ന സങ്കീര്ണമായ തന്മാത്ര ഘടനകളാണിത്.
ചൊവ്വ പര്യവേഷണത്തിനായി 2011 നവംബര് 26നാണ് നാസ റോബോട്ടിക് പേടകമായ ക്യൂരിയോസിറ്റി റോവര് വിക്ഷേപിക്കുന്നത്. വളരെക്കാലം മുന്പ് ചൊവ്വയില് നിലനിന്നിരുന്ന സാഹചര്യങ്ങളെക്കുറിച്ചും അവിടുത്തെ ജീവന്റെ സാധ്യതകളെക്കുറിച്ചും കണ്ടെത്താന് ഈ ദൗത്യം സഹായകരമാകും എന്ന പ്രതീക്ഷയിലാണ് ഗവേഷകര്.
