തിരുവനന്തപുരം: കുമാരാരാമം ഇടപ്പഴഞ്ഞി ബാലസുബ്രഹ്മണ്യസ്വാമിക്ഷേത്ര മതപാഠശാല പോലീസ് തല്ലിത്തകര്ത്തില് ഭക്തജന പ്രതിഷേധം ശക്തമാകുന്നു. പ്രതികളെ പിടിക്കാനെന്ന പേരില് പോലീസ് ക്ഷേത്രാചാരങ്ങള് തകര്ത്തു. ശ്രീകൃഷ്ണ വിഗ്രഹം തറയിലേക്ക് വലിച്ചെറിഞ്ഞ് ഷൂവിട്ട് ചവിട്ടി. മതഗ്രന്ഥങ്ങള് വലിച്ചെറിഞ്ഞു. പോലീസ് നടപടിക്കെതിരെ അതിശക്ത പ്രതിഷേധവുമായി ഭക്തജനങ്ങള്. മറ്റൊരു മതത്തിന്റെ ആരാധാനാലയത്തിലാണെങ്കില് പോലീസുകാര് സര്വീസിലുണ്ടാകില്ലെന്നും ക്ഷേത്രാചാരങ്ങള് തകര്ത്തവര്ക്കെതിരെ നടപടി വേണമെന്നും ആവശ്യം ഉയരുന്നു.
കഴിഞ്ഞ ദിവസം വട്ടിയൂര്ക്കാവ് മലമുകളില് യുവതിക്ക് നേരെ നഗ്നതാപ്രദര്ശനം നടത്തിയതിനെതിരെ പരാതി നല്കിയതിനെ തുടര്ന്നുണ്ടായ സംഘര്ഷത്തിന്റെ പേരിലാണ് പോലീസിലെ ഒരു വിഭാഗം ക്രിമിനല് സംഘം ക്ഷേത്രത്തിലേക്ക് ഇരച്ചുകയറിയത്.
ക്ഷേത്രത്തില് അതിക്രമിച്ചുകയറി മതപാഠശാലയുടെ വാതിലും കസേരകളും ചവിട്ടി തകര്ത്താണ് പോലീസ് സംഘം അകത്ത് കടന്നത്. അകത്ത് കടന്നയുടനെ മതപഠനത്തിനായി വച്ചിരുന്ന മതഗ്രന്ഥങ്ങള് വലിച്ചെറിഞ്ഞ് നിലത്തിട്ട് ചവിട്ടി. അവിടെ നിലവിളക്കിന് മുന്നില് വച്ചിരുന്ന ദേവീദേവന്മാരുടെ ചിത്രങ്ങളും ശ്രീകൃഷ്ണന്റെ പ്രതിമകളും വലിച്ചെറിഞ്ഞെന്നുമാത്രമല്ല ബൂട്ടിട്ട് ചവുട്ടി. മേശകളും കസേരകളും പുറത്തേക്കെറിഞ്ഞു.
ഉച്ചയ്ക്ക് 1.30ഓടെ മതപാഠശാല യോഗം നടക്കവെയാണ് ഒരു കൂട്ടം മഫ്തിയിലുള്ള പോലീസുകാര് ക്ഷേത്രമതില് ചാടിക്കടന്നെത്തിയത്. യോഗത്തില് പങ്കെടുത്തുകൊണ്ടിരുന്നവരെ ഇവര് പൂട്ടിയിട്ടു. പിന്നാലെയെയാണ് യൂണിഫോം ധരിച്ച പോലീസുകാര് ക്ഷേത്രഗേറ്റ് ചവിട്ടിത്തുറന്ന് ഇരച്ചെത്തിയത്. സ്ഥലത്ത് ഭീകരാന്തരീക്ഷം സൃഷ്ടിച്ച പോലീസ് അക്രമി സംഘം നാട്ടുകാരെ വിരട്ടിയോടിച്ചു. തുടര്ന്നാണ് അക്രമം അഴിച്ചുവിട്ടത്.
യോഗത്തില് പങ്കെടുക്കുകയായിരുന്ന ആറ് പേരെയും ക്രൂരമര്ദ്ദനത്തിനിരയാക്കി. ഉടുമുണ്ട് വലിച്ചുരിഞ്ഞ് അപമാനിച്ചു. വലിച്ചിഴച്ചാണ് വാഹനത്തിലേക്ക് കയറ്റി ക്യാമ്പിലേക്ക് കൊണ്ടുപോയത്. പോലീസിലെ ഒരു വിഭാഗം ഗൂഢാലോചന നടത്തിയാണ് ക്ഷേത്ര മതപാഠശാല ആക്രമിച്ചത്. മലമുകളില് ഡിവൈഎഫ്ഐക്കാരാണ് പോലീസിന് നേരെ അക്രമം നടത്തിയത്. അത് മറച്ചുവയ്ക്കാനായി ഇടത് അതുകൂല പോലീസ് സംഘടന ഇടപ്പെട്ട് ക്ഷേത്ര മതപാഠശാല ആക്രമിക്കാന് പദ്ധതിയിടുകയായിരുന്നുവെന്ന് വ്യക്തമായിട്ടുണ്ട്.
